Operartartup nuuteeraliaa kuultinnattoq
Josef Lund Josefsen ukiuni aqqanilinni operartartutut erinarsortarpoq, nunatsinnilu ilisimaneqarluarluni. Taassuma nuuteeraq nutaaq "Juullimi siullermi" saqqummerseqqammerpaa. Nuuteerarlu 3.000-nit pisiarineqarami kuultinnappoq.
Operartartup angusani tulluusimaarutigalugulu tupaallaatigaa:
- Nuanneqaaq, tulluusimaarnaqaaq soorunami taamatut angusaqarluni. Ilimaginngikkaluarakku ullumikkut teknologi unammillertigilernikooqigatsigut, itunesikkut allatigullu nuuteerarsineq atugaalernikuunermik. Taamaattumik ilimagerpiarnikkuunngikkaluarpara taamatut qaammatingajak ingerlanerinnaani tuniniarnerani angusaqassallunga, Josef Lund Josefsen oqarpoq.
Josefsen: Sinerissami angalaneq Idamut eqqaaniarfiuvoq
Taanna nuuteeqqap saqqummersinneranut atatillugu sinerissatsinni tusarnaartitseqattaarluni angalavoq. Erinnat atorneqartut agiarsuarmut tulluussarneqarlutik aaqqissugaapput. Ilaatigullu pattagissat noqartillit orgelillu atorneqarlutik tusarnaartitsisoqarpoq.
Uanili operartartutuanngortoq Josef Lund Josefsen eqqaamasaqangaarluni sinerissami tusarnartitseqattaarpoq.
- Angalalluta tusarnaartitsinitsinni immikkuullarissumik tusarnaartitsineq ingerlakkatsigu. Tassa Ida Heinrich eqqaaniarlugu, saniatigullu juullerpaluttunik tusarnaartitsineq ingerlakkatsigu
Nunatsinni inuit amerlanerpaat juulli tipaatsuffittut nuannersumik ulapaarfittut atortarpaat, erinarsortartumullumi aamma taamaappoq:
- Naak tungaanut ulapaarfiusaraluaqisoq uannut isumalerujussuuvoq. Nuannersumik ataatsimoorneq, ilaquttat, ikinngutit, kissalaarneq, asanninneq taama oqaatigilluaannarlugu. Isumalerujussuuvoq, Josef Lund Josefsen oqarpoq.
Taassumma nuuteeraliani tusarnaartitsissutigeqattaarlugu nunatsinni illoqarfinni aqqaneq marlunni tusarnaartitsivoq.