Godhavnimi najugaqarsimasut 28-t eqqartuussivilersuussiniartut
Danmarkimi meeqqat angerlarsimaffianni Godhavnimi najugaqarsimasut ilaat 28-t naalagaaffimmit 8,4 millionit koruuninik taarsiivigineqarnissartik piumasaralugu naalagaaffik maanna eqqartuussivilersuunnialerpaat. Aviisi Jyllands-Posten, taama allaaserisaqarpoq.
Meeqqat angerlarsimaffianni najugaqarsimasut taakku tamarmik immikkut 300.000 koruuninik taarsiivigineqarnissartik piumasaraat, meeqqammi taakku angerlarsimaffimmi Godhavnimi 1960-ikkunni najugaqarnermi nalaani sumiginnagaasimasimasutut misigisimapput.
Meeqqat angerlarsimaffianni Godhavnimi najugaqarsimasut 17-it allat paarinerlugaasimanertik pillugu tamarmik immikkut 300.000 koruuninik ukioq manna februaarimi taarsiiffigineqarput, danskit naalagaaffiat isumaqatigiissuteqarfigalugu taarsiiffigineqarlutik.
AAMMA ATUARUK Meeqqat angerlarsimaffianni Godhavnimi najugaqarsimasuni 17-it taarsiiffigineqassasut
Meeqqat angerlarsimaffimmi Godhavnimi najugaqarnermi nalaani sumiginnagaasimanerat, Danmarkip ministeriunerata Mette Frederiksenip, ministeriunerusimasut akornanni siullersaalluni naalagaaffik sinnerlugu utoqqatsissuteqarfigaa.
AAMMA ATUARUK Nukappiaqqanut Godhavnimiissimasunut utoqqatserpoq
Meeqqat angerlarsimaffianni Godhavnimi najugaqarsimasut pillugit suliaq immikkut maluginiagassaavoq, kalaallimmi meeraannut misileraatigineqarsimasunut 22-nut suliamut tamanna assinguvoq. Taakku ministeriunermit siorna aamma utoqqatserfigineqarput.
Meeqqat misileraatigineqarsimasut akornanni arfinillit suli uumapput, suliamullu atatillugu naalagaaffimmit taarsiiffigineqarnikuunatik. Taakku meeqqat angerlarsimaffianni Godhavnimi najugaqarsimasut assigalugit aamma eqqartuusivilersuussisinnaapput.
