Huawei nunatsinni attaveqaatinut 5G-mik pisiortorfiussanngitsoq
Kinamiut attaveqaatinut suliffeqarfissuat, Huawei Nunani Avannarlernerni pisiortorfigineqarnianngilaq, Danmarkimi TDC-p Huawei 5G-mut attaveqaatinik pisiortorfiginagu Ericsson pisiortorfiginiarlugu ukioq manna siusinnerusukkut nalunaarutigaa
Norgemi Telenor assinganik sapaatip akunnerata siuliani nalunaaruteqarpoq, maannalu Tele-Postip nunatsinni 5G-mut attavinnik Huawei pisiortorfiginiarnagu aamma nalunaarutigaa.
Naak Tele-Post attaveqaatinik 2018-imi novembarimi nunatsinni sumiiffinni tamani atuutilersunik 4G-usunik annertusiinissamut pilersaaruteqanngikkaluarluni taama nalunaaruteqarpoq.
- Oqarasuaatitigut attaveqaatinut maanna 4G-mik ingerlasunut annertusaaniarnermi ataatsimut isiginninnermi Erisssonip suleqatiginissaa toqqarneqarnikuuvoq. Teknologii taanna kiisalu atortorissaarutit siunissamut qulakkeeqqapput, taamaammat nutarsarneqarsinnaapput teknologiillu 5G-usut atorneqarsinnaallutik. Taamaammat 5G nunatsinni atugaalerumaarpoq, tamatumali pinissaanut suli ulluliisoqarnikuunngilaq. Aamma Huawei-ip Tele-Postimi 5G-mut attaveqaatinik pisiortorfinngornissaa periarfissatut isiginngilarput, Tele-Postimi pisortaq oqarpoq.
Ericsson atuinnarniaraa
Savalimmiormiut suliffeqarfillu Føroya Tele Ericssonimik toqqaanatik Huawei-imik toqqaanissaat kinamiut nunatsinnut, Danmarkimut, Savalimmiunullu aallartitaata kimigiississutigigaa nipimi immiussamiittoq saqqummersinneqareersorlu Huawei sapaatini akunnerni kingullerni tusagassiuutinit ukkartarineqangaatsiarpoq.
AAMMA ATUARUK Kinap Savalimmiut Huawei-imut isumaqatigiissuteqarnissamut siorasaaraa
Huawei-ip kinamiut naalakkersuisuinut qanittumik attaveqarneragaanera pillugu nunat kitaaniittorpassuit qularinnilerput. Kinami naalagaaffiup Huawei-imit 5G-mut attaveqaatit atorlugit kilitsissiatut misissuisinnaanera nunat aarlerissutigaat.
Pasilliutigineqartulli Huawei-ip eqqunnginnerarpai, Tele-Postip pisortaata oqarnera naapertorlugu tamanna Tele-Postip Huawei-imik toqqaanani Ericssonimik toqqaaneranut sunniuteqanngilaq.
- Oqarasuaatinut angallattakkanut attaveqaatit tamarmik siorna taarserpagut, 5G-mullu attaveqaatinik pisiortorfissamik allamik toqqaasoqassaguni attaveqaatit tamaavimmik taarserneqassapput, tamanna piviusorsiornerunngilaq, TelePostip pisortaa, Kristian Reinert Davidsen oqarpoq.
Huawei attaveqaatit ilaannik tunioraasuusoq
Tele-Postip Ericsson 4G-mut attaveqaatinik pisiortorfissatut 2017-imi novembarimi toqqarpaa. Aalajangerneq ataatsimoortumik naliliinermi pitsaassutsimik akimillu ilaatigut naliliinermik tunngaveqarpoq, isumannaassuserlu naliliinermi aamma ilaalluni.
- Attaveqaatit sorliit pitsaanerunersoq oqaatigissallugu ajornarpoq. Ericssonip toqqagassanit uatsinnut toqqagassatut eqqortuunera nalilernikuuarput. Tamanna ataatsimut isiginninnermeerpoq, aappaa aappaanit isumannaannerunersoq oqaatigisinnaanngilara, Kristian Reinert Davidsen oqarpoq.
AAMMA ATUARUK Nunarput tamakkerlugu 4G-mik maanna attaveqalerpoq
Naalli Huawei nunatsinni 5G-mut attaveqaatinik tunioraasunngussanngikkaluartoq kinamiut nunatsinni attaveqaatit ilaannik tunisisuuvoq.
Tassa Huawei-ip nunatta Canadap Islandillu atassuteqarnissaa imaatigut kabelimut 4600 kilometerinik isorartutigisumut stationeqarfiit tunivai.
Tele-Postip stationeqarfiit – attaveqaateqarfittut allatulli – isumannaassuseq pillugu misissorneqallattaasartut oqaatigaa.
Attaveqaatinut suliffeqarfiup, Namminersorlutik Oqartussanit pigineqartup 5G-mut attaviit nunatsinni qaqugu siammarterneqalissanersut maannamut suli oqaatigisinnaanngilaa.
