Omikronip allannguutaa nutaaq aasaru tuniluunnerpaalissasoq ilimagineqartoq

Omikronip allannguutaa nutaaq – BA.5 – Danmarkimi aasap ingerlanerani tuniluunnerpaalissangatinneqarpoq.

Danskit peqqinnissamut ministeriat, Magnus Heunicke (S) Twitterikkut allappoq.

Statens Serum Instituttip allannguummik taassuminnga tunillatsissimasut amerliartornerat sapaatini akunnerni arlalinni malinnaavigaa.

BA.5 omikronip allannguutaanit allanit napparsimarulunnerutitsisarnersoq takussutissaqanngitsoq, ministeri paasissutissiivoq.

Kisianni ineriartornera qanimut malinnaavigineqarpoq.

- Omikronip allannguutaata BA.5-ip suli allanngoriartornera takusinnaavarput. Danmarkimi sapaatip akunnerani 22-mi allannguummik taassuminnga tunillatsissimasut 17 procentingajaapput, Heunicke allappoq.

Afrikap kujataa aamma Portugal

Naak tunillatsissimasup allamut tunillaasinnaassusaa 0,8-miikkaluartoq tuniluunneq piffissami matumani “tunillaassuinermit annikitsumit qaffakkiartortumiippoq. Tuniluunnermi annikitsumik tunngaveqartoq, ministeri allappoq.

Allannguutinik nutaanik tunillaassortoqalernissaa ilimagineqareersimasoq ineriartortoqarneralu piffissap ingerlanerani ernumassutigisimanagu, Roskilde Universitetimi tunillaassortoqarnerani kisitsisilerinermik lektorip Viggo Andreasenip sapaatip akunnerata siuliani oqaatigaa.

AAMMA ATUARUK Alle corona-restriktioner er ophævet

- Sapaatini akunnerni kingullerni tamanna naatsorsuutigisinnaasimavarput, pissutigalugu Afrikap Kujataani Portugalimilu allannguutit nutaat tuniluunnerat aamma qaffakkiartornerat pillugu nalunaarutigineqarfigineqaratta.

- Tamanna allannguutit tuniluutillaqqinnerannik aamma akiuussuserneqarsimanitsinnit tunillatsissimanitsinniillu tunillanneqarsinnaannginnitsinnut qarsussillaqqinnerannik ilaatigut pissuteqarpoq.

Nunatsinni tuniluuttoqanngitsoq

Omikronip allannguutaa alla BA.2.12.1 sapaatini akunnerni kingullerni aamma tuniluunnerusoq paasineqarpoq.

Nunatsinnilu ernumasariaqanngitsugut, nakorsaaneq, Henrik L. Hansen oqarpoq. Coronamik suli tunillatsissimasoqartarpoq – aamma tunillatsissimasunik nutaanik akuttusuunillu suli paasisaqartoqartarpoq. Coronamilli tunillaassortoqarneranik maanna oqartoqarsinnaanngilaq.

Tunillaasinnaassuseq kisitsisilerilluni naatsorsuineruvoq, taamaaliornikkut virusip qanoq tuniluutiatigineranik missiliorniartoqartarpoq. Kisitsit inuiaqatigiinni qanoq tunillatsissimasoqartigineranik takutitsineq ajorpoq.

Tunillaasinnaassuseq assersuutigalugu 0.9-miikkuni tamanna tunillatsissimasut qulit agguaqatigiissillugu qulingiluanut allanut tunillaasinnaanerannik isumaqarpoq.