Naalakkersuisut siulittaasuat Kuupik Kleist, Nunat OLT-nut ilaasortaasut EU-llu ukiumoortumik Bruxellesmi ullut marluk ataatsimeereersullu, oqarpoq
Nunat nunasiaataasimasut akornanni isumaqatigiissutit nutarsarneqarnissaat aallartisarneqalersut.
-Nunatsinniit pingaarnertut saqqummiunneqarput EU-mut isumaqatigiissuteqarnikkut aningaasat pissarsiarineqartartut, aammalu EU-mut akitsuusigaanngitsunik niueqateqarsinnaanermut isumaqatigiissutit millisarneqannginnissaat. Aalisarnikkut isumaqatigiissutip, aamma ilinniartitaanikkut ilisimatusarnikkullu suleqatigiinnerup annertusaaffigineqarnissai saqqummiunneqarput, kiisalu silap allanngoriartorneranut ilisimatusarnerit EU-p issittumi ingerlanniagaasa nunatsinnit aallaaveqartumik ingerlanneqarnissaat piumasarineqarluni,
Naalakkersuisut siulittaasuat Kuupik Kleist nassuiaavoq.
Nunat OLT-mut ilaasut ataasimoortumik piumasaqaatai ima nassuiarpai.
-OLT-mi suliat ataatsimut isigalugit piumasaqaatit tassaanerupput taakkunani nunani pissutsip aallaaviginerullugit isumaqatigiissusiortoqartassasoq, assersuutigalugu nunat nunasiaatigineqarnikuusut EU-mut ungasissumi inissisimapput taamaalilluni nioqqutissiagut assartorneqartarlutik aqqutini takisoorujussuarnik taamaalilluni unammilleqatigiinnikkut arlaatigut EU-p immikkut pisariaqarpaatigut. Kuupik Kleist oqarpoq.
Angallanneq assartuinerlu Nunani OLT-mut ilaasortaasuni, nunanut piorsarsimasunut sanilliullugu kinguarsimaqaaq. Tamakkualu aamma EU-p suleqataaffigisinnaasaattut piumasaqaatigineqarput.
Piujuaannartitsinissaq eqqarsaatigalugu aalisarnikkut EU-p piumasaqaatai annertusiartuinnartussaapput, tamannalu nunatta avaqqussinnaangikkaa Kuupik Kleist oqarpoq.
-Politikkip nutarsarneqarnerani tunngavissarilluinnarparput piumasaqaatit taamaattuunera aamma nammineq inatsisiliornitsigut tamanna anguniartussaavarput, aamma taassumap saniatigut inuussutissanik nakkutilliinikkut pisussaaffiit aamma taakkua isumaqatiginninniutigivagut neriullutalu ukiup matuma ingerlanerani taakkua naammassisinnaassallugu taamaalilluta akornusersorneqarpallaanngitsumik EU-mut niuersinnaanerput ingerlanneqarniassammat.
Nunatta EU-mut isumaqatigiissutai aasaru Naalakkersuisuni piffissap qiteqqaarnerani nalilersorneqarumaarput, soorlu EU-mut isumaqatigiissutit ukiut marluk pingasullu qaangiuppata isumaqatiginninniutigineqaqqikkumaartut.