PITUFFIK Olsvig: Eqqartuussissuserisumik misissuisitsinerup inerneranik saqqummiussisoqartariaqaraluarpoq

Pituffimmi kiffartuussinissamik isumaqatigiissutip annaaneqarneranik Naalakkersuisut eqqartuussissuserisumik misissuisitsinerata inerneranik innutaasunut inatsisartunullu saqqummiussisoqartariaqaraluarpoq. Taama Inuit Ataqatigiit siulittaasuat Sara Olsvig, tusagassiuutinut nalunaaruteqarluni allappoq.

Misissuisitsinerup inernera Naalakkersuisunit suli tunniunneqarsimanngimmat Sara Olsvigip isornartoqartippaa, naak misissuisitsinerup inernera eqqartuussissuserisup juulip ulluisa arfineq aappaanni ukiormanna Naalakkersuisunut tunniutereeraluaraa.

Tamanna naammaginanngilaq, Sara Oslvig isumaqarpoq.

- Isumaqarpunga nalunaarut taama ittoq Inatsisartuni ataatsimiititaliamut attuumassuteqartunut ingerlaannartumik nassiunneqartariaqartoq, soorlu aamma innuttaasut nalunaarusiorneq aningaasartuutaasimasoq qanoq inerneqarsimaneranik paasisaqarnissaminnut pisinnaatitaaffeqartut, Sara Olsvig oqarpoq.

Sara Olsvigip ilanngullugu oqaatigaa, Inatsisartut tamarmiusut marsip qaammataani isumaqatigiillutik Naalakkersuisunut kaammattuuteqarmata, misissuisitsineq saqqummiunneqassasoq eqqartuussissuserisup misissuitsineq Naalakkersuisunut tunniuppassuk.

Misissuisitsinermit nalunaarusiap saqqummiunneqarnissaanut Sara Olsvig Naalakkersuisunut arlalinnik apeqquteqaateqarpoq taakkualu akineqarnissaat maannna utaqqineqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl