Olga P. Berthelsen kisermaassiniatut pasillerpaa
Kisianni ilaasortaaginnaqqulluni tunuliaqutiminit kaammattoorneqarnermi kingorna ilaasortaaginnasaaq. Parteeqatinilu Finn Karlsen eqqaassanngikkaanni, ataatsimiititaliami ilaasortaqatiminut saamasaanngeqaaq, taakkununnga oqasii oqaasii naakitsaaqalutik.
- Amerlanerussuteqarneq atorlugu tassaalerput, suugaluarpalluunniit naqissumik naqissusiillutik, eqqunngitsulioraluarpataluunniit eqqortutut isikkoqartitsisartussat, Per Berthelsen oqarpoq.
Siumut sinnerlugu aningaasaqarnermut ataatsimiititaliami ilaasortaq Air Iceland pillugu atatsimiinnermi isumaqataanani ataatsimiiffimmit anivoq. Inatsisartut Aningaasaqarnermut ataatsimiititaliaanni piffissami sivitsortumi aalassarsimaarput.
Siullermik Namminersorlutik Oqartussat Islandimiut timmisartortitseqatigiifiannut isumaqatigiissutaat isornartorsiorlugu, atorunnaarseqqummassuk tupigusuttoqarpoq. Taava naalakkersuisuutitaqartut ataatsimiititaliami ilaasortaasa tamarmik - siulittaasup, siulittaasup tulliata ilaasortallu ataatsip - ataatsimiititaliami ilasortaanertik taamaateriataarpaat - oqaratillu sooq.
Taava Air Icelandimut isumaqatigiissut pillugu Ataatsimiititaliap Naalakkersuisunut apeqqutaannut akissutit Per Berthelsenip naammaginagit kamappoq. Per Berthelsen aningaasaqarnermut ataatsimiititaliamit tunuarnissaminik eqqarsaanni sapaaatip akunnerata naanerani Siumumut saaffiginissutigaa, partiimilli ataatsimiititaliamiiginnarnissaa kissaatigineqarmat partiip kissaataa akueraa.
Air Icelandimut isumaqatigiissut pisunut qitiuvoq. Aningasaqarnermut Ataatsimiititaliap isumaqatigiissut akueralugu tusagassiutinut nalunaarpoq, kisianni tamatumani Olga P. Berthelsen, Andreas Uldum Juliane Henningsenilu kisimik atsiortuupput, tassalu ilaasortat Siumumeersut, Per Berthelsen Finn Karlsenilu ilaanngillat. Per Berthelsen isumaqarpoq aningaasaqarnermut ataatsimiititaliami ilaasortat amerlanerussuteqartut pikkorissartariaqartut, akisussaaffiit suut tunngavigalugit aningaasaqarnermut ataatsimiititaliaq sulisussaanersoq.
Naammangittaalliornermut pissutaavoq, aningaasaqarnermut ataatsimiititaliami ilaasortat nutaat oqaluuserisassat, Naalakkersuisut Air Icelandimut isumaqatigiissutertik pillugu akissutaannut tunngasut, oqaluuserisassanit peersimannatigit. Per Berthelsen aperivoq, sooq Aningaasaqarnermut Naalakkersuisoq naalakkersuisuuffigisaannit allamut nuunneqarnersoq, aammalu inatsisartut aningaasaqarnermut ataatsimititaliaani ilaasortat taarserneqarnersut, Per Berthelsen aperivoq.
- Aningaasaqarnermut ataatsimiititaliami ilaasortat taarserneqartarnerat qaqutigoortorujussuuuvoq ulluinnarsiutaananilu, Per Berthelsen oqarpoq.
Per Berthelsen Naalakkersuisut Air Iceland-imik isumaqatigiissutaat pillugu apeqqutinik arfineq marlunnik apeqquteqarpoq akineqanngitsunik. Ataatsimmiititaliami oqaluuserineqartut avammut tusarliutinnginnissaanik Per Berthelsen peqquneqarpoq. Siumut tusagassiuutinut nalunaaruteqarluni allappoq, kisermaassilluni naalakkersuineq maannna Olga Poulsen Berthelsenimit aningaasaqarnermut ataatsimiititaliamut atuutsinneqalersoq.
