Ole Dorph: Suliffissaaleqisut ikilisinneqarnissaannut suliniutaasinnaasut tamaasa qujaruppavut
-Kommunitsinni suliffissaaleqineq annertoqaaq, suliffissaaleqisullu ikilisinneqarnissaannut suliniutaasinnaasut tamaasa qujaruppavut, borgmester Ole Dorph oqarpoq:
-Kommuunitsinni suliffissaaleqineq annertuvoq, sanaartorneq ukiuni kingullerni annikitsuinnaasimavoq. Qaasuitsup Kommunia aamma aalisarnikkut inuussutissarsiorfiuvoq annertooq, tamatumalu malitsigisaanik suliffissuarni annertuumik ingerlatsitsivoq. Aalisarneq unikkaangat suliffissuit aamma unittarput. Taamaattumik suliffissaaleqinerup annertunera isertuussinnaanngilarput, Qaasuitsup Kommuniani borgmesteri Ole Dorph Siumumeersoq taama oqarpoq.
Aningaasaqarnermut Naalakkersuisoq Vittus Qujaukitsoq aamma kommuneqarfiit kattuffianni Kanukoka-mi siulittaasoq Martha Abelsen, tamarmik Siumumeersut, tusagassiutinut nalunaarummik allapput aningaasaqarneq ilungersunartoq kommuunillu aningaasaqarnerat tatineqareeraluaqisoq aningaasartuutit amerliartuinnassasut.
Naalakkersuisut kommuunillu suliffissaaleqisut ikilisinniarlugit suleqatigiinnialerput
-Inatsisartuni kommuuninilu politikerit sivisuumik attanneqarsinnaasumik aningaasaqarnikkut ineriartornissaq qularnaarniarlugu maanna akisussaalertariaqalerput. Suliffiit nutaat ataavartut pilersinneqassappata aaqqissuusseqqinnissamut unammillersinnaanermullu pitsanngorsaataasumik suliniuteqarnissamut politikkikkut sapiissuseqarnissaq piumassuseqarnissarlu pisariaqarpoq, Martha Abelsen oqarpoq.
Tamanna pillugu Aningaasaqarnermut Naalakkersuisoq Vittus Qujaukitsoq isumaqataavoq, oqarporlu Naalakkersuisut kommuunillu innuttaasut toqqissisimatinnissaannut tamarmik akisussaaffeqartut.
-Nunatsinni ingerlataqarnerulernissaq suliffissaqartitsinerulernissarlu pillugit suliffissaqartitsinissamik siuarsaataasussanik arlalinnik kommuunit suleqatigalugit iliuuseqarnialerpugut, oqarpoq.
Qaasuitsup Kommuniani borgmesterip Ole Dorphip immikkut ittumik suliniarnissamik isumaqatigiissut ilassilluarpaa, sanaartornissat siuartinneqarnerisa saniatigut suliffissaaleqisut pikkorissartinneqarsinnaanerat suliffissaaleqisut ikilisinneqarnissaannut aqqutissat ilagisinnaanerarpai.
-Suliffissuarni sulisartut immikkut ittumik isiginiarneqarlutik pikkorissartinneqarlutillu sulitinnissaat pisariaqarsorinarpoq, siunissaq aamma eqqarsaatigalugu tunisassiorfiit sikusartumiittut suliassaat inereernerullugit suliarineqartalernissaat anguneqarsinnaasuugaluarpat suliffissaaleqineq taama annertutiginavianngikkaluarpoq.
Borgmesterit sinneri oqaaseqartinniaraluaratsigit iluatsinngilarput.
