Naalakkersuisut kommuunillu suliffissaaleqisut ikilisinniarlugit suleqatigiinnialerput

Kommuneqarfiit kattuffianni KANUKOKA-mi siulittaasoq Martha Abelsen allappoq aningaasaqarneq ilungersunartoq kommunillu aningaasaqarnerat tatineqareeraluaqisoq aningaasartuutit amerliartuinnassasut.

-Inatsisartuni kommuuninilu politikerit sivisuumik attanneqarsinnaasumik aningaasaqarnikkut ineriartornissaq qularnaarniarlugu maanna akisussaalertariaqalerput, Martha Abelsen oqarpoq.

Aamma isumaqarpoq aaqqissuusseqqinnissamut unammillersinnaanermullu pitsanngorsaataasumik suliniuteqarnissamut politikkikkut sapiissuseqarnissaq piumassuseqarnissarlu pisariaqartoq, suliffiit nutaat ataavartut pilersinneqarsinnaaniassammata.

-Ajornartorsiutit aaqqinnissaat kinguarsartuaannarsinnaanngilarput, erseqqissaavoq.

Aningaasaqarnermut Naalakkersuisup Vittus Qujaukitsup Martha Abelsen isumaqatigaa, oqarporlu Naalakkersuisut kommunillu innuttaasut toqqissisimatinnissaannut tamarmik akisussaaffeqartut.

-Nunatsinni ingerlataqarnerulernissaq suliffissaqartitsinerulernissarlu pillugit suliffissaqartitsinissamik siuarsaataasussanik arlalinnik kommuunit suleqatigalugit iliuuseqarnialerpugut, oqarpoq.

Vittus Qujaukitsup aamma erseqqissaatigaa aningaasaqarnermut politikki kiisalu aaqqissuusseqqinnermut politikki pillugit naalakkersuinikkut isumaqatigiittoqarnissaa Naalakkersuisut kissaatigigaat.

-Taamaattumik pineqartut pillugit Inatsisartuni partiit siunissami qaninnermi oqaloqatiginiarpakka, Vittus Qujaukitsoq oqarpoq.