Politikki

Ole Dorph Qaasuitsup Kommuniani pisortat tapersersorpai

Qaasuitsup Kommuniani meeqqat atugarliortut pillugit Meeqqat Illersuisuata nalunaarusiaanut Qaasuitsup Kommuniani pisortaasa, Hans Eriksenip Henrik Soloyillu sakkortuumik isornartorsiuinerat arlalinnik akerlerineqarpoq. Kommunimili borgmesterip, Ole Dorphip pisortat illersorpai

Allattoq Ivik Kristiansen, Thomas Munk Veirum

novembarip 06-at 2015 16:43

- Hans Eriksenip tusagassiuutinut nalunaarusiaa, taanna aallaaveqarpoq, uagut ulluinnarni sulisorisatta oqariartuutaat taamaalilluta apuukkusukkatsigit. Suliaq sunaluunniit illuatungaannaanit isigineqartussaanngilaq. Suna tamarmi illuatungeriillugu nalilerneqartussaavoq, Ole Dorph oqarpoq.

Meeqqat illersuisuata nalunaarusiaa Qaasuitsup Kommuniani pisortanit marlunnik sakkortuumik isornartorsiorneqarpoq, siunissami sulinissamut atorneqarsinnaanngitsoq ilaatigut taaneqarluni.

Taamatullu isornartorsiuinerat ulluni kingullerni oqallisaasorujussuuvoq.

Aamma atuaruk Meeqqat Illersuisuata isornartorsiuineq akerlilerpaa

Akuersaarneqarsinnaanngilluinnartoq

Ilaatigut Qaasuitsup Kommuniani borgmesterip tullersortaanit, Jess Svanemit, Meeqqat Illersuisuata nalunaarusiaa siunissami sulinermi atorneqartussaasoq, kommunalbestyrelsimit isumaqatigiissutigineqartoq oqaatigineqarpoq, pisortallu isornartorsiuinerat akuersaarneqarsinnaanngilluinnartoq, Qaasuitsup Kommuniani Siumup gruppia sinnerlugu allaaserisaqarluni.

- Isumaqatiginngilluinnarparput. Kommunalbestyrelsimi, isumaqarpunga, tamatta ilaasortaasugut taamatut nalunaaruteqariasaarneq tupaatigerujussuaripput, narrujuummiutigalugulu, Jess Svane sisamanngornermi taama oqarpoq.

Ole Dorphilli pisortat isornartorsiuinerat tunuliaqutserpaa, taamaasillunilu Siumup Qaasuitsup Kommuniani gruppianut akerliusumik isumaqarluni.

Aamma atuaruk IA: Borgmesterip ajornartorsiut nassuerutiginngilaa

Aalajangiusimavaa

Jess Svaneli Meeqqat Illersuisuanut kisimiilluni tapersersuinngilaq.

Aamma Ilinniartitsisut, perorsaasullu kattuffii, IMAK aamma NPK, tapersersuisunut ilaapput.

Pisortalli isornartorsiuinerat, Ole Dorphip aalajangiusimavaa.

- Inunnik isumaginninnermik aamma meeqqanik inuusuttunillu sullissisunik sulisorpassuaqarpugut. Taakkualu uagut ulluinnarni sulisorigatsigit, oqariartuullu ilisarisinnaanngimmassuk, taakku oqariartuutaat soorunalimi allaffissornikkut pisortatta avammut nalunaarutigivai, Qaasuitsup Kommuniani borgmesteri Ole Dorph oqarpoq.