IMAK-ip siulittaasuata, Sivso Dorph.

Meeqqat Illersuisuata isornartorsiuinera peqatigiiffiit paasisinnaavaat

Sumiginnaasoqarneranik atornerluisoqarneranillu kommunimut kalerriutiginnittoqaraangat, tassanngaanniit iliuuseqarniarnerat arriippallaartaqaaq. Qaasuitsup Kommuniani taamaappoq, aammali kommunit sinnerini taamaappoq.

Ilinniartitsisut perorsaasullu kattuffiiniit, IMAK-imit NPK-miillu, taama oqarput.

Meeqqat Illersuisuallu taama ersarissuliortiginera, perorsaasut siulittaasuata Naussúnguaq Bisgaardip nuannaarutigaa.

- Tassa ukiorpassuarni aamma ilisarisimasarivarput, Kalaallit Nunatsinni meeqqat sumiginnagarparujussuit avannaaniinnaanngitsoq, nunatta sineriaa tamaat aamma isigalugu, Naussúnguaq Bisgaard oqarpoq.

Aamma atuaruk Meeqqat Illersuisuata isornartorsiuineq akerlilerpaa

Aamma IMAK-ip siulittaasuata, Sivso Dorphip, Meeqqat Illersuisuata isornartorsiutaa ilisarnartippaa.

Ilinniartitsisut meeqqanut ulorianartorsiortunut toqqaannartumik attaveqartuupput. Ilinniartitsisullu suliassanik  apuussisartuupput, kommunit iliuuseqarniassammata.

- Taamatut saaffiginnittoqaraangat, saaffiginnittut pillugit arlalitsigut kommunini tamani arriippallaartumik illiuuseqartoqartarpoq, Sivso Dorph taama oqarpoq.

Aamma atuaruk Berlingske: Danmark iliuuseqartariaqarpoq

Meeqqat ilumoorullugu sullinniaraanni inuiaqatigiit tamarmiusut qanoq iliornissamut pilersaarusiortariaqartut, taanna isumaqarpoq.

Kommuninut saaffiginnikkaluarnerup iluaqutaaneq ajorneranik isornartorsiut, perorsaasut aamma ilisarnartuutippaat.

- Meeqqanik sumiginnakkanik taamatut tunniussigaangatta, soorunami suliaq sukkaattuarakasiusarpoq, inunnik isumaginnittut amigaqimmata ulapputeqaqimmatalu, taavalu suliat aamma sivisoorujussuarmik ingerlanneqartarmata, Naussúnguaq Bisgaard oqarpoq.

Aamma atuaruk Martha Lund Olsen meeqqat pillugit nassuiaateqartussanngortoq

Kattuffiit siulittaasuisa marluullutik qangali ajornartorsiummik angisuujusumik pingaaruteqartumilli suliassaqarnerput tikkuarpaat. Apeqqutaaginnarpoq, qanoq ingerlariaqqissanersugut.

Sivso Dorph isumaqarpoq aallaqqaataaniik aallartittariaqartugut, ajornartorsiuteqartoq nassuerutigalugu, tassanngaanniillu aallartilluta.

- Ajornartorsiuterpassuarnik assigiinngitsunik Nunatsinni peqarpugut, taakkualu sumiiffinni asigiinngitsuni assigiinngiiaarsinnaapput, ilaatigut annertunerusarlutik annikinnerusarsinnaallutilluunniit, Sivso Dorph oqarpoq.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat