Ole Aggo Markussen NUSUKA-mi pisortaajunnaarpoq
- Taamaanngilaq. Peqatigiiffiup siulersuisuisa juli naalersoq ataatsimiikkamik allaffissornikkut sipaarniartoqassasoq aalajangerpaat. Ole nammineerluni soraarumavoq aggustimilu sulinngiffeqarnissaminut periarfissinneqarluni, sulisitsisut peqatigiiffianni NUSUKA-mi siulittaasoq Gerth B. Lynge radioaviisumut oqarpoq.
- Peqatigiiffiup maanna inissisimanera siulersuisut eqqartorpaat aalajangersimasumillu allaffimmioqassanngitsoq aalajangiunneqarluni - taava taassuma suliassai maanna uanga isumagilissavakka. Sulinngiffeqareerlunga uteqqammerpunga NUSUKA-llu Industrivej-imi allaffia ingerlaannassanersoq matuneqassanersorluunniit maanna isummerfigisussaallugu, Gerth B. Lynge ilisimatitsivoq.
- Taamaaliornerli peqatigiiffiup atorunnaarneranik isumaqanngilaq. Ilaasortavut ikiligaluartut suli suliassaqarpugut. SIK-mut isumaqatigiinniarnerput naammasseqqammerparput maannalu umiartortut pillugit isumaqatigiissummut ilaliussassamik suliaqassalluta, Gerthi naggasiivoq.