Sermersooq OL-ertoqarnissaanut peqataasussaq nersornaaserneqarpoq
Kulturikkut illorsuarmi Katuami immikkut aaqqissuussisoqarpoq, timersornerullu silarsuaani assigiinngitsut nersornaatisipput.
Nersornaatini akimanerpaat "Timersornermi nersornaat" ujakkaartartumut Martin Møllerimut, NSP-meersumut, tunniunneqarpoq.
Martin Møller, Danmarks Idrætsforbundimit ilisimatinneqaqqammerpoq Naalagaaffeqatigiit sinnerlugit Korea Kujallermi Pyeonchangimi februaarimi OL-ertoqarnissaanut peqataassasoq.
Nersornaatit allat aamma tunniunneqarput, inuilli amerlasuut timersornerup iluani suliaqarnerat aamma pingaaruteqartoq borgmesterip Asii Chemnitz Narupip eqqaasitsissutigaa:
- Nuanneqaaq ukiut tamarluinnaasa timersorneq peqatigiiffilerinerlu persuarsiutigalugit Katuami inersuaq ulikkaartarsinnaagatsigu. Taamaammat - ukiup ingerlanerani ullumilumi tunniussassinnut, nuannaarlusi timersornermi peqataasarnisi ullormut maannga aamma nuanneqataasunut ilaammat qutsavigaassi. Ilissimi inuunersi kisiat immersunngilarsi, tamatsinnulli maligassiuisuuvusi nuannaarnermillu siammarterisuullusi.
Nersornaatisisut tassaapput:
Timersornermi nersornaat Martin Møller, NSP
Ukioq manna iligiit pitsaanersaat: B-67 Badminton
Ukioq manna piukkunnaateqarnerpaaq: Aninnguaq Eigaard, Fight Club Nanoq
Ukioq manna aqutsillammak: Nive Heilmann, Inuit, Dene Games
Ukioq manna sungiusaallammak: Finn Meinel, B-67
Kajumissaasiut: Anette Jørgensen aamma Fie Hansen, Vandgymnastik
