Obama issittoq pillugu qanoq pilersaarpa?

New York Washingtonilu ilaatigut tikinneqassapput, USA-llu Danmarkimut EU-mullu pissusai ataatsimiittartut oqallisigissavaat, minnerunngitsumillu Obamap Issittumut pilersaarutai tusarniaassutigissallugit.

Tusagassiuutinut nalunaarummi tamana atuarneqarsinnaavoq.

Inuit Ataqatigiinneersoq, Sara Olsvig, politikerinik arlalinnik oqaloqateqarnissamut periarfissaqassaaq, suliniatigiiffiit naalakkersuisunut attuumassuteqanngitsunik, tassa NGO-nik, peqatigiiffinnik nunanit assigiinngitsuneersunik, isummersuisinik atorfilinnillu qaffasissunik oqaloqateqarnissaminut aamma periarfissaqarluassalluni.

Politikerit taakku, qallunaat inatsisartuineersut, USA-p naalagaaffiup iluani pissutsinut politikkianik paasisaqarfiginninnissaminnut periarfissarsissapput, minnerunngitsumik USA-p nunat allat pillugit politikkia paasisaqarfigissallugu, Obamallu Issittoq pillugu pilersaarutai suunersut paasissallugit.

- Angalanissatsinnut pilereqaanga, amerikamiut politikkiat pillugu uagut inatsisartunut ilaasortaasugut annertuumik paasitinneqassaagut. Pingaartumik qilanaaraara USA-p nunat allat pillugit siunissamut pilersaarutai tusassallugit, Washingtonimilu inatsisartunut ilisaritinneqarnissara aamma qilanaareqaara, Sara Olsvig tusagassiuutinut allappoq.

Issittumi naalagaaffiup isumannaatsuunissaanut USA-p isumaliutiginninnera præsident Obamap pisortaqarfianeersunik ataatsimiinnermi saqqummiunneqassaaq.

Issittoq pillugu amerikamiut qallunaallu suleqatigiinnerat politikerit aamma tusagaqarfigissavaat.