Issittumi takornarianut nassuiaassisartutut ilinniagaqalissaaq
Issittumi takornarianik nassuiaassisartussatut ilinniartut maanna 19-iupput, aatsaallu taama amerlatigisut ataatsikkut ilinniarput, ilinniarnertillu qaammatip aappaata qeqqa maanna ingerlatereerlugu. Issittumi takornarianik nassuiaassisartutut ilinniartitaaneq ukiuni pingasuni ingerlareerpoq.
Issittumi takornarianik nassuiaassisartutut ilinniartitaanermi pisortaq Henrik Ebbe Nielsen tusagassiuutinut taama nalunaaruteqarpoq.
Ilinniartut Nunatsinni illoqarfinni tamaneersuupput, Qaanaamit Tasiilamut, Issittumilu takornarianik nassuiaassisartutut ilinniarnerminnik naammassinnissimasut sineriak tamaat atorfeqalersinnaapput.
Aamma atuaruk Partii Naleraq: Takornarianik angallassisartut avataaneersut atornagit
Ilinniartut qaammatini pingasuni ilinniarnerminni Nunatta oqaluttuarisaanera, kulturia, pinngortitaq nunataalu pillugu pikkorissarsimapput, soorlu aamma attaveqaqatigiinnermut tunngasunik, nassuiaariaatsillu assigisaallu aamma pikkorissarfigisimallugit.
Qaqortumi ilinniarfeqarpoq, ilinniartitaanerulli takornariat ornigarluartagaannut Ilulissani aamma ingerlanneqarsinnaanissaa, takornarialerisut aamma kissaatigaat.
Takornarianillu nassuiaassisartutut ilinniartut 19-it maajimi sapaatip-akunnerini arlalinni Avannaanukassapput, takornarialerisunut pulaassallutik, qimussernermillu aamma misilittagaqalissallutik.
Issittumi takornarianik nassuiaassisartutut naammassiniaraanni ilinniarnerup nalaani assigiinngitsunik soraarummeertoqartarpoq:
- Issittumi takornarianik nassuiaassisartutut piukkunnarluartut naammassisarnissaat taamaalinikkut qulakkiissavarput, Henrik Ebbe Nielsen, Campus Kujallermeersoq oqarpoq.