Silap pissusia 2015-imi nutaamik rekordiliivoq
Nunarsuup silaata kiassusia, imaviit qaffasissusiat gassillu silaannarmik kissatsikkiartortitsisartut silaannarmut aniatinneqartut siorna aatsaat taama qaffasitsigipput.
Naalagaaffiit Peqatigiit silasiornikkut suleqatigiiffiat MRO naapertorlugu, 2016-imi aamma taamaassaaq silalu sumiiffinni assigiinngitsuni siornatigut misigineqanngitsumik kiannerulissalluni.
USA-mi nalunaarusiaq ilisimatuut nunarsuarmit tamaneersut 450-it ilisimasaannik tunngaveqarpoq - avatangiisinullu tunngatillugu rekordit uisssuumminartut arlallit nalunaarusiami uppernarsarneqarput.
Gassit silaannarmik kianneruleriartortitsisartut aniatinneqartut qaffakkiartorput rekordiusullu tamaasa siorna qaangerneqarlutik. Taava aamma nunarsuup silaa nalunaarsorneqartalermalli 2015-imi atsaat taama kiatsigaaq.
Aamma atuaruk Nunatta silaa pisarnermit kiannerusoq
Immap kiannerpaaffiatut 2014-imi nalunaarsugaasoq aamma qaangerneqarpoq - imaviillu qaffasinnerpaaffiatut 1993-imi nalunaarsukkat aamma 70 millimeterinik siorna qaangerneqarlutik.
Tamatumalu peqatigisaanik kiattup anorersui 101-it aamma nalunaarsorneqarput.
Aamma nunarsuarmi sumiiffinni arlalinni, ilaatigut Indiami aamma Kangia qiterlermi, panernersuaqarpoq, ukiuni hunnorujulinni aatsaat taama ingasatsigisunik.
- Gassinik silaannarmik kianneruleriartortitsisartunik aniatitsineq unitsivissoraluarutsiguluunniit silap pissusiata arlalitsigut suli allanngoriartussaaq. Ukiuni aggersuni rekordiliinernk amerlanernik takussaagut, DMI-mi ilisimatuut ittuat Jens Hesselbjerg TV2-mut oqarpoq.