Nunatta silaa pisarnermit kiannerusoq
![](/sites/default/files/styles/image_934x467/public/article_images/dmi.jpg?itok=H_ngZ6WU)
Kangerlussuarmi ippassaq ataasingornermi apriilip ulluisa aqqarnanni 17,8 gradinik kiappoq, tamannalu rekordiuvoq. Kingullermik taama kiatsigimmat 1996-imi apriilip ulluisa 30-anni pivoq, taamanikkut 16,0 gradinik kiakkami.
Nuummi ippassaq aamma kiappoq, mittarfimmi uuttortaasoqarmat 16,6 gradinik kiakkami. Nuummi piffissap taamaalinerani kingullermik taama kiatsigimmat 1969-imi apriilip ulluisa 29-anni 13 gradinik kiappoq, taannalu maanna tassa qaangerneqarluni. DMI taama allaaserisaqarpoq.
Aamma atuaruk Februaarip qaammataa aatsaat taama kiatsigisoq
Sermersuup portunerpaaffiani Summitimi aamma kiappoq. Ilisimatuummi misissuisarfianni tassani ullumikkut apriilip ulluisa aqqaneq-aappaanni minus 6,5-imik issippoq. Kingullermik taama issinngitsigimmat 2007-imi apriilip ulluisa 30-anni uuttortarneqarpoq, taamanikkut minus 8,2 gradinik issikkami.
(Silaannaq kiattoq kujataaneersoq matumani pissutaavoq. Naqitsiniisaffiillu Newfoundlandimeersut arlallit avannarparterput, naqitsinertuffillu Tunup kujasissortaaniittoq pissutaalluni silaannaq kiattoq nunatta kimmut sineriaa atuarlugu avannamukaarpoq, Sermersuarmullu aamma anngussimalluni.
Sermersuup aasaanerani aakkiartortarnera pisarnermit siusinnerusukkut ukioq manna aamma aallartippoq. Sermersuummi 10 procentinik annikilligaangat aasaanerani aakkiartorneratut taaneqartarpoq, tamannalu ippassaq ataasinngornermi aallartippoq.
Silalli pisarnermit kiannerunera tamaanga killeqarallassagunarpoq, ullunimi tulliuttuni issinnerulaaleqqittussaanera DMI-p nalunaarutigaa.
Aamma atuaruk Immat aggustimi aatsaat taama kissartigisut