Februaarip qaammataa aatsaat taama kiatsigisoq
![](/sites/default/files/styles/image_934x467/public/article_images/februar_varmerekord_2016_nasa.png?itok=6dffTLGm)
Nasami misissuisoqarfik Goddard Institut - Giss - naapertorlugu, silaannaap kiassusia piffissamut 1951-imit 1980-mut naleqqiullugu agguaqatigiissillugu 1,35 gradinik qaammat kingulleq kianneruvoq.
Gissip pisortaata, silap pissusianik ilisimatusartup Gavin Schmidtip, uuttortaanerit ataasiakkaat qaqutigorluinnaq oqaaseqarfigisarpai, kiannerpaaffittulli uuttortarneqartoq manna Twitterikkut "wow"-imik oqaasertalersimavaa.
Pingaartumillu nunarsuup affaani avannarlermi kiassuseq maluginiagassaavoq. Piffissamummi 1951-imit 1980-imut naleqqiullugu 2,76 gradinik kiannerusimavoq.
Issittup silaannaa 5,36 gradinik kiannerulersimavoq, imalu ingasatsigaaq Danmarkip Silasiorfiata DMI-p kiassutsip allanngorarnera takussutissiariumallugu qalipaatinik ilisarnaasersuisarnini allanngortittariaqarsimallugu.
Nunarsuup ilaani tassani, ukiuni kingullerni 1000-ini aatsaat taama kiatsigigunarpoq, silasiortoq Eric Holthaus nittartakkami slate.com-imi taama allappoq.
- Silaannaap kiatseruttorfia sivikitsuinnaassagunaraluartoq, pisoq nunarsuarmiunut nunarsuatsinnullu tunngatillugu pingaaruteqarluinnartuuvoq, silasiortoq allappoq.
Nunarsuup silaannaata aatsaat taama kiatsiginera inuit pilersitaannik silap pissusiata allanngoriartorneranik aamma El Niñomik, Amerika kujalliup kimmut sineriaata avataani imartap piffissami aalajangersimasumi nalinginnaanngitsumik kissatsittarneranik peqquteqarpoq.