Immat aggustimi aatsaat taama kissartigisut
Qaammatip siuliani nunarsuaq tamakkerlugu nunami imartanilu uuttuinerni agguaqatigiissillugu aggusti aatsaat taama kiatsigisoq, Amerikamiut ilisimatuut
USA-mi naalakkersuisut imaani silaannarmilu pissutsinut pisortaqarfianneersut oqaatigaat.
Ukiut 135-t matuma siornagut uuttuisoqartalermalli, qaammammi tassani kiassuseq rekordiliiffiuinnarani, 1880-ip kingorna immat aatsaat taama kissartigisut ilisimatuut oqaatigaat.
- Immap qaavata kissassusianik 1900-kkunni agguaqatigiissitsinermut naleqqiullugu, nunarsuaq tamakkerlugu agguaqatigiissitsinermi aggusti 0,78 gradinik kissarneruvoq. Qaammatini agguaqatigiissitsinermi 1880-imit 2015-imut aatsaat taama kissartigitillugu uuttuisoqartoq, ilisimatuut allapput.
Immat kissassusianni ukiormanna juulimi kissarnerpaatut rekordiusoq aggustimi 0,04 gradinik qaangerneqarpoq.