Kommuneqarfik Sermersuumi borgmesterinngortussaq: Suliassaq annertoqaaq
- Nassuerutigissavara ilimagisimannginnakku Kommuneqarfik Sermersuumi taama sukkatigisumik borgmesteritut inisseriataarnissara, kisianni tassa politikki taamaappoq aamma nuannequtigivaa nalunatoqartarnera.
Kommuneqarfik Sermersuumi juunip 15-ianiit borgmesteritut imminut taasinnaanngortussaq Inuit Ataqatigiinneersoq Avaaraq S. Olsen taama oqarpoq.
Charlotte Ludvigsenip tunuarniarluni aalajangernera suliat ajorluinnartut arlallit kommunillu ineqarnermut susassaqarfiata aqunneqarneranik isornartorsiuisoqarnerata kingorna pivoq.
Suliamimi Namminersorlutik Oqartussat Nakkutilliisuisa kukkunersiuisullu nalunaarusiaani kingullermi paasisat nutaat saqqummerput.
KNR-i Nuummi innutaasut isumaannik paasiniaalluni ataasinngormat apersuivoq. Borgmesterinngortussarlu inatsisinik malinnissinnaasariaqartoq innutaasut neriuutaasa ilagaat. Kommunalbestyrelsellu sulinera pillugu innuttaasut tatiginnileqqinnissaat Avaaraq S. Olsenip suliassaraa.
- Tatiginnilersitsinissamut suliaq annertoorujussuuvoq, kisianni tassa suleqatigiit iluanni tatigineqarpunga taamatut kivitsisinnaasutut aamma peqqissaarlunga sulinikkut taanna kivissinnaasorivara.
- Kivitassaq suliassaq annertoqaaq aamma naatsorsuutiginngiivippara kisima suliarissallugu, kommunalbestyrelsip tamarmiusup torersaaneq kisianni aamma kivitseqqinneq taanna akisussaaffigigaa isumaqarpunga.
Tatigineqarnini tulluusimaarutigigaa
Narsarmiu Avaaraq Olsen Nuummut 2007-mi nuuppoq, ilinniartitsutullu ilinniagaqarluni. 37-nik ukioqarpoq Kommuneqarfik Sermersuumilu atuarfeqarfinnut siunnersortitut maanna sulilluni.
Taanna siorna kommunemut qinersinermi 241-nit taaguunneqarluni Kommuneqarfik Sermersuumi kommunalbestyrelsemut ilaasortanngorpoq.
Avaaraq S. Olsenip politikeritut sulinera 2013-mi aallartippoq, Kommune Kujallermilu 2017-ip tungaanut qinikkatut sulinermini borgmesterip tullersortaata aappaattut ilaatigut sulilluni.
Kommuneqarfik Sermersuumilu juunip 15-ianiit borgmesterinngortussanngorpoq.
- Nuannaaqaanga aamma tulluusimaaqaanga qujamasullungalu taama annertutigisumik tatiginninnermik takutitsiffigineqarama.
Borgmesteritulli politikkikkut suut anguniagarissavai?
- Massakkut taanna iserfiginngikkallassavara kisianni pingaarnertut soorunami innuttaasut partiit allat oqaloqatigisussaavakka siunnerfissatsinnut tikkuusseqataasussaammat. Kisianni pingaartittorujussuuara massakkuminngaanniit kommunalbestyrelsimi sulitta toqqissisimanartumik ingerlanneqarnissaa qulakkiissallugu.