Nuutoqqami allanngortiteriniarneq akerliuffigaat

Nuup saava, Nuutoqaq, nutaanik illuliorfigineqassasoq, Kommuneqarfik Sermersuup pilersaarutigaa.

Peqatigiiffik "Nuummit Eqqaamasat"  Nuutoqqami illunik nutaanik sanaartortoqarnissaa pillugu akerliussutsimik takutitsisimapput. Isumaqaramik taamaaliornikkut Nuutoqqap oqaluttuassartaa aserorneqassasoq.

Illoqarfimmik pilersaarusiortartup Bilo Høegh Stigsenip oqaatigaa Nuutoqaq allanngortiterneqalinngitsoq, kisiannili illunik nutaanik sanaartornikkut nukittorsarneqassasoq. 

Akerliussutsiminnilli takutsitsisut isumaqarput Nuutoqaq aserorluinnarneqalersoq. Bilo Høegh Stigsenilli tamanna akerlilerpaa.

- Uagut isitsinniit isumaqarpugut Nuutoqaq aserorneqalinngitsoq. Pilersaarutaavormi Nuutoqaq nukittorsarneqassasoq. Nuutoqqallu oqaluttuassartaa aamma sanaartornikkut nukittorsarneqassasoq, Illunik titartaasartoq, illoqarfimmillu pilersaarusiortartoq Bilo Høegh Stigsen oqarpoq.

Akerlianiillu peqatigiit isumaqarput Nuutoqaq isikkumisut isikkoqaannassasoq, allanngortiterneqarani.

- Isumaqaratta Nuutoqaq ullumikkutut isikkoqarluni kingulitsinnut pigiinnarneqassasoq allanngortisarnagu. Oqaluttuarisaanermi Nuup ineriartornera nunattalu tamarmi ineriartornernut takanna qitiunikuummat. Tassa taanna tunngavigalugu Nuutoqaq ullumikkutut isikkoqarluni pigiinnarneqassasoq uagut sorsuutigaarput, Stephen Heilmann oqarpoq.

Pilersaarusiortoqaleruttorpoq

Nuutoqqalli nutarsarneqarnissaa Bilo Høegh Stigsenip nuannaarutigaa. Pilersaarusiornerillu ingerlallualeruttorput.

- Neriuutigaarput Nuutoqqami arlalinnik illunik sanaartortoqassasoq. Massakkorpiarlu sanaartortoqassanngilaq. Pilersaarusiortoqaqqaassaarli tamakku piviusunngussappata. Pilersaarutaavoq katersugaasiviup allisinnneqarnissaa, tamanna kissaatigineqarmat. Aammalu hoteliliortoqarnissaanik pilersaaruteqartoqarpoq, tamannali aamma nutaamik pilersaarusiortoqareerpat piviusunngorsinnaavoq. Pilersaaruteqarpassuaqarpoq. Siunissami arlalinnik pisoqarsinnaavoq, Bilo Høegh Stigsen oqarpoq

Nuutoqqami hoteliliortoqarnissaa annertuumik akerliussutigineqarpoq. Bilo Høegh Stigsenili oqarpoq tusarniaanerit ingerlanneqareerpata aatsaat tamanna piviusungorsinnaasoq.

- Tamanna suliniutigalugu aallartinneqareerpoq. Kisianni eqqaamaneqassaaq aatsaat pilersaarusiortoqareerpat tusarniaanerillu ingerlanneqareerpata aatsaat hoteliliornissaa piviusunngorsinnaavoq. Nuummi najugaqartut pilersaarusiornermi peqataatinneqassapput, Bilo Høegh Stigsen oqarpoq.

Amutsivitoqqap piiarneqarnissaa ernummatigineqarpoq. Tamannali ernummatissaanngitsoq Bilo Høgh Stigsen oqarpoq.

- Amutsivitoqaq eqqartoqarneqaqaaq, peerneqassanngilarli. Ilaminerngali mikineq pukkitsoq nutaannginnertaa peerneqassaaq. Tassa juullip inuata sullivikua piffissap ilaanni peerneqassaaq, Kommuneqarfik Sermersuumi illoqarfinnik pilersaarusiortartoq Bilo Høegh Stigsen oqarpoq.