Nuussuaq tunisassiorfissaminik utaqqiuarsinnarpoq

Bendt Frederiksen Inatsisartut siulittaasorisimasaat oqarpoq, Nuussuarmi 450 tonsinut inissalimmik qangali neriorsuisoqarsimagaluartoq. Tamannalu aaliangerneq pisimavoq 1990kut aallartilaarneranni, namminermi politikkimiit tunuarpoq ’95mi. Tunitsiviliornissamulli pilersaarutit unitsinneqariasaarsimapput, taarsiullugu Qasigiannguani qaleralileriffik sananeqalermat, taannalu 2000mi atulerpoq.

Upernavik Seafoodtimi pisortaq Flemming Andersen oqarpoq, namminneq 2004mi tunitsiviliorniarlutik neriorsuisimallutik. Containerilli illikartitassat pillugit Pilersuisoq uteriisaarfigisimanngilaat, soorluttaaq isumaqaramik Upernaviup eqqaani inissaatitik pisarineqasinnaasunik suppoqqavallaartut.

- Kisianni tassa ukiut marluk matuma siornatigut neriorsuivugut sananiarluta, namminerli imminut piumaffigivallaarsimanngilagut piviusunngortitsinissamut, taamaammat ukiut marluk kingulliit suli sanaartortoqarnikuunngilaq, Flemmeing Andersen oqarpoq.

Bendt Frederiksen oqarpoq piginneqatigiiffiit arlallit imminut saaffiginnittaraluartut, Nuussuarmi tunitsiviliorusullutik. Isumaqarporlu massakkut Upernavik Seafood unammillerteqaleriarami sanaartupallannialersoq.