Nuup unnuisarfikippallaarnera pissutigalugu Air Greenland ilaasussallu ilungersunartorsiortut

Silap ajornera pissutigalugu sapaatip-akunnera kingulleq Nuummi timmisartumut ilaasussat ingerlariaqqissinnaajunnaartut amerlasoorujussuupput. Amerlangaaramik ilai mittarfimmi sinittariaqarsimapput – unioqqutitsillutik – Air Greenlandip unnuiffigisinnaasaannik neqeroorsinnaasimannginnera pissutigalugu.

Ilaasussap ilaata nassatanik tigusisarfiup eqqaani qanoq sinissanerluni inoqatinut attaveqaqatigiittarfikkut saqqummiussisimavoq, massa allat unnuiffissaminnik neqeroorfigitinnissaminnut akunnerit 26-t angullugit utaqqisimallutik oqaluttuartut.

- Nuummi unnuiffissaqannginneq pissutaavoq, saperngusut amerlammata, sapaammi, ataasinngornermi marlunngornermilu tikittussat aallartussallu amerlammata inuppassuit maaniipput, taama Air Greenlandimi attaveqaqatigiinnermut akisussaasoq Inga Dora G. Markussen nassuiaavoq.

- Utaqqineq sivisusimavoq, taavalu mittarfimmi unnuinissamik oqarfigineqarsimasut pillugit oqassaanga tamanna pisinnaanngilaq inatsisitigut inerteqqutaavoq, taanna oqarpoq.

Iluuseqarpallaarsinnaannginneq

Air Greenland Nuummi akunnittarfinnik unnuisarfinnillu isumaqatigiissuteqarpoq, kisianni timmisartuutileqatigiiffiit allat Nuummiit Nuummut timmisartuussisartut assinganik isumaqatigiissuteqarput, tamannaavorlu unnuiffiusinnaasunut tunngatillugu unammillernartuusoq.

- Kisianni uani aamma peqqutaaqataavoq, timmisartuutileqatigiiffiit allat  unnuiffissanik uagut aqussinnaanngisatsinnik inniminniisarput – taamaalillunilu ullormiit ullormut allanngorartarput.

Unnuiffiusinnaasullu allatorsimaffitsinniittut ulikkaaraangata, Air Greenlandimiit iliuuseqarpallaarsinnaanatik, taassuma erseqqissaatigaa.

Aasarpoq aasalerpoq, timmisartorpassuit tikittartussaapput. Unnuiffissaqarnissaq Air Greenlandimit piareersimaffigineqarpa ?

- Oqaatigereersinnaanngilarput qaqugu saperngusoqarumaarnersoq, tamanna aqussinnaanngilarput, taamaattumik unnuisarfinni akunnittarfinnilu innimineereersinnaanngiagut, ima oqarluta: “piffissami uani inniminneereerniarpugut.”

Air Greenland pilersaaruteqanngilaq Nuummi unnuisarfimmik akunnittarfimmik pilersitsinissaminik?

– Nuummi akunnittarfiliortoqarnissaanik unnuisarfiliortoqarnissaanik takorluuisoqanngilaq massakkuugallartoq.

Air Greenlandip sila aamma sakkortuumik silaannaap aalarulusinnaanera pissutigalugu ippassaq sapaammi ullumilu ataasinngornermi timmisartuussinissat unitseqqippai. Tamanna Nuummi ilaasussarpassuarnut ingerlariaqqissinnaanngitsunik eqqueqqippoq.