VIDEO Nuup pigisaani Kangerup avataani nanoq naammattooraat
Taama oqaluttuarpoq Karina Meincke uinilu Kangerup eqqaani angallamminnik ingerlaartillutik nanoq takugamikku.
- Nanoq angisooq angallammik qanittuarannguanngortarparput immitsinnullu isitsigut isigisinnaasarluta. Piffissap ilaani nanoq aqqartarpoq minutsillu 45-t ingerlaneranni nanoq malinnaaffigalutigu.
Nanoq nunaqarfiusimasumi Kangermi najugaqarfiusartumut qanittumiimmat, nannumik inoqarfimmut qanittumi takusaqaraanni iliuutsit suut atorneqartarnersut paasiniarlugit politiinut saaffiginnipput.
- Politiit saaffiginissuteqarnermi akissuteqarlutik oqarput, nanoq kangerup eqqaani takuneqartoq Nuummit ungasippallaartoq najugaqarfiusumullu qanittumiinngimmat inunnullu ulorianartorsiortitsinngimmat qanoq iliuuseqarniaratik, politiit akissuteqarlutik oqarput.
AAMMA ATUARUK Nannut illoqarfimmiit qimaatinneqartarnissaanni nakkutilliisut imassallu gummiusut atorneqartassapput
Nuummi politiini pigaartup Malik Hansenip KNR-imut uppernarsarpaa, nannumik Kangerup eqqaani naluttumik takusaqartoqarneranik nalunaarfigineqarsimallutik ippassaq unnukkut nalunaaqutaq aqqanernut tanneq qulinngortoq.
Politiit nalilerpaat, nanoq takuneqartoq inunnut ulorianartorsiortitsinngitsoq annertunerusumillu iliuuseqartoqassanngitsoq, politiini pigaartoq KNR-imut oqarpoq.
KNR-ip oqaloqatigisai naapertorlugit nanoq kangerup avannaani kujataanilu naluttoq qimassimavat.
Karina Meinckep nanoq filmiliarisimasaa uani ataani takusinnaavat: