Assi: Kalaallit Airports A/S

Nuup Mittarfiani isumannaallisaanermut killeqarfik naannerusoq akuerineqartoq

Nuummi mittarfittaassami isumannaallisaanermut killeqarfissaq Angallannermut Aqutsisoqarfiup akueraa, naak nunani tamalaani inassutigineqartoq takinerugaluartoq. Tusarniaanermi akissuteqaatigineqartumi isumannaallisaanermut tunngatillugu ernumanartoqartinneqarpoq. Air Greenlandilli ernumanartoqartinngilaa.

Nuummi mittarfik 2200 meterinut tallineqarpat isumannaallisaanermut killeqarfik 150 meteriussaaq. Tamannalu nunani tamalaani inassutigineqartunit naanneruvoq.

Kalaallit Airports A/S-ip Danmarkimilu Angallannermut, Sanaartornermut Ineqarnermullu Aqutsisoqarfiup suliniummik akuersissuteqartup tamanna uppernarsarpaat.

Isumannaallisaanermut killeqarfik tassaavoq mittarfiup ungataa, timmisartut ajornartorsiussagaluarunik silaluunniit ersernerluppat atorsinnaasaat.

AAMMA ATUARUK Angalatitsisartut mittarfinnut pilersaarut utaqqisimagaat

Naalagaaffiit Peqatigiit Nunat tamat akornanni inuinnaat silaannakkut angallanneqarnerannut kattuffiat, ICAO, naapertorlugu, mittarfiup isui minnerpaamik 150 meterinik ilassuteqarnissaat nunani tamalaani piumasaqaataavoq.

Taakkunanngalu 60 meterit asfaltimik qallerneqarsimassapput. Nunalli ilusia apeqqutaatillugu mittarfiup isuisa isumannaallisaanermut killeqarfiup katillugu 300 meteriunissaa inassutigineqarpoq.

Mittarfiulli maanna inissisimaffigisaa tunngavigalugu mittarfiup isuisa 300 meterinik ilassuteqarnissaat pisinnaanngilaq. Taamaammat Kalaallit Airports A/S isumannaallisaanermut killeqarfiup 150 meteriunissaa qinnuteqaatigaa, tamannalu Angallannermut, Sanaartornermut Ineqarnermullu Aqutsisoqarfimmit akuerineqarpoq.

 

Air Greenlandip pisortaanera: Ernumassutissaqanngilaq

Tamannalu illuliassanik titartaasartup Peter Barfoedip mittarfimmut VVM-imik nalunaarusiap tusarniaassutigineqarnerani akissutimini isumannaallisaanermut killeqarfiup takissusissaanik isornartorsiuisup ernumanartoqartikkaa, Sermitsiamit allaaserineqarpoq.

Air Greenland A/S-illi pisortaanerata Jacob Nitter Sørensenip pissutsit ernumanartoqartinngilai.

Taassuma erseqqissaatigaa nunarsuarmi mittarfippassuit allat ICAO-imit inassutigineqartut naammassisimanngikkaat. Nunatsinnilu mittarfiit amerlanersaanni aamma naammassineqanngillat.

AAMMA ATUARUK Mittarfittaassap isikkorinnerunissaanut suliaq aallartereerpoq

- Nunap iluserisaa pissutigalugu tamanna anguneqarsinnaanngikkaangat, sillimaniarnerup qaffasissusia attatiinnarumallugu allatigut aaqqissuussisoqartarpoq. Matumani aamma taamaaliortoqassaaq. Taamaammat isumannaallisaanermut killeqarfinnut mittarfiullu akuerineqarneranut tunngatillugu, immikkut ilisimasalinnit oqartussanillu misissuiffigineqarsimanerat tunngavigerusuppara, Jacob Nitter Sørensen taama oqarpoq.

Timmisartortitseqatigiiffiup anorimut killiliussai atuuttut Nuummi mittarfittaassamut tunngatillugu Air Greenlandip  aalajangiusimaannassagai, Jacob Nitter Sørensenip aamma oqaatigaa.

 

AAMMA ATUARUK Kalaallit Airportsip Qaqortumi mittarfissap pilersaarusiornera aallartippaa

Mittarfimmut kategori 3-mut kategori 4-mullu mittarfiup isuini isumannaallisaanermut ilassutissanut ICAO-ip malittarisassiuussai inassutigisaalu assitaliussami qulaani takuneqarsinnaapput. Nuummi mittarfittaassaq kategori 4-voq. Tamatumunngalu piumasaqaatigineqartoq tassaavoq ilassutigineqartumi 60 meterit asfaltimik qallerneqarsimassasut isumannaallisaanermullu 90 meterit timmisartunut akornusersuutitaqanngitsumik immikkoortinneqarsimassasut. Inassutigineqartorli tassaavoq mittarfiup isuini isumannaallisaanermut killeqarfiit 300 meteriunissaat. Najoqqutarisaq: FN's ICAO Anneks 14, Volume 1.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat