Nuup Ilulissallu mittarfii tallineqarniarunnaarput
Naalakkersuisunullu ilaasortaq, Jens B. Frederiksen, maanna akissuteqarluni oqarpoq, Nuummi Ilulissanilu mittarfiit tallineqarnissaannut Naalakkersuisut pilersaaruteqanngitsut, suliassaqarfilli taanna Naalakkersuisut eqqumaffigiuaraat.
- Naalakkersuisut pingaartippaat najoqqutassat pigineqareersut tamarmik atorneqassasut, angallannermullu ilusiliaq angallannermit kisitsisinik inuiaqatigiillu aningaasaqarnerannik nalilersuissuteqarluni nammasseqqammersoq oqallinnermi tunngavigineqassaaq, angallannerup ilusilerneqarnissaanut periarfissanut assigiinngitsunut atatillugu aalajangiinermut iluaqutissatut sakkussaalluni, Jens B. Frederiksen oqarpoq.
Ammasumik oqaloqatigiinnissaq aallaavigalugu angallannermut ilusiliap saqqummiunneqarnissaanut Attaveqaqatigiinnermut Ineqarnermullu ataatsimiititaliaq Naalakkersuisut qaaqquaat, saqqummiussinermut tassunga atatillugu Nuummi Ilulissanilu mittarfiit 1199 meterimut tallineqarnerannut ilusiliap misiliutitut atorneqarneranit inerniliussat assersuutitut saqqummiunneqassamaartut, Jens B. Frederiksen allappoq.
