Nuup Eqqumiitsulianik katersugaasiviani eqqumiitsuliat alutornartut
Saqqummersitsinermi "Happy Hour Art 3"-mi eqqumiitsuliortut pingasut saqqummersitsipput, Ulla Salling-Mortensen, Malene Guldager aamma Jens Krogsdal Gudnason. Kiinnanik ilusilersukkat, qalipakkat ilusilersukkallu alutornartut allat tallimanngormat ualikkut alakkarterneqarsinnaalerput.
-Siornatigut aqqummersiteqatigiinnikuuvugut, aamma eqqumiitsuliortuuvugut pingasut assigiinngitsupilussuarnik suliaqartuusut. Suliatta Kalaallit Nunaanni taama soqutigineqartigineri assut nuannerpoq, Ulla Salling-Mortensen knr.gl-ip ilanngutassiortuanut oqarpoq.
Mortensen Århus Kunstakademimi kingisissukkut ilinniarsimavoq. Ilinnialernissani sioqqullugu Ulla Slalling-Mortensen ukiorpassuarni eqqumiitsuliortarsimavoq, aatsaalli uini toqukkut qimagummat ilinnialersimalluni.
-Uiga toqukkut peerummat ilinniarfimmi pikkorissarniaraluarpunga iluatsinnaguli. Taava ilinniarfimmi ilinniarnissamik qinnuteqarpunga, ajornartorsiulaareerlungalu iluatsillugu. Taamani eqqumiitsuliortunut tusaamasanut attaveqarsimanngilanga, titartakkanilli suliarisamalu assinginik nassiusseriarama ilinniarnissannut akuerisaavunga, Ulla Salling-Mortensen nassuiaavoq.
Ulla Salling-Mortensenip Nuup Eqqumiitsulianik katersugaasiviani suliaminik saqqummersitai qiviaannarlugit ilinniarnissaminik toqqaasimanera aalajangiinerusimasoq eqqortoq. Eqqumiitsuliat kusanarluinnartut, qalipaatigissaartut alutornartunillu assitalersukkat. "Happy Hour Art 3"-mi saqqummersitseqataasa marluusut suliaat aamma taamatut oqaatigisariaqarput.
