Nuummiut balletterrannialeqaat
Nuummi meeqqat 100-nit amerlanerusut ukioru ballettimik misiliisussanngorput. Qiajuk Studio tamatuminnga aaqqissuisuuvoq.
Allattoq Peter Troelsen, Simon Uldum
Sapaatit akunnerani uani aallartinneqarpoq, peqataaniarlutillu takkuttorpassuit aaqqissuisut tupaallaatigisimavaat. Balletternerup saniatigut ilaatigut aamma Hip Hopimut Jazzimullu qitinneq meeqqat misilittarsinnaavaat.
- Ilinniartitsinissamik neqerooruteqartarnerput kalaallit qitittartutut ilinniakkaminnik naammassissut amerliartornerat iluatigalugu ineriartortipparput, aamma ilinniartut kalaallisut danskisullu oqaasillit ilitsoqqussaralugit oqaatsitik atorlugit ilinniartinneqarnissaat sulissutigaarput, Qiajuk Studiomi piginneqataasoq Alexander Montgomery-Andersen taama oqarpoq.