Nuummiit Københavnimut bilitsit akikillissapput
Akit 10-miit 30 procentit missaannik appassapput, tassa bilitsit allanngortinneqarsinnaasut aammali killilersuutitallit siunissami akikinnerulissapput.
Air Greenlandip unammillerneqarnerminik ilungersuussinini akinik appaanermigut takutikkusuppaa, tamatumalu atuisunut iluaqutaanissaa nuannaarutigalugu.
- Air Greenlandip sivikitsuinnarmik piseqqusaaruteqartarnernut aammalu atuisunut immikkut toqqakkanut akikilliliissuteqartarnernut sanilliullugu ukiuni arlaqartuni akit nalinginnaasumik appartinnissaat sulissutigaa. Akinik appaanermi uani angalasut unammilleqatigiiffiunerpaami akikinnermik angalanissamut periarfissinneqarput, Michael Binzer oqarpoq.
Nuup Københavnillu akornanniinnaq
Akinik appaaneq taamaallaat Nuummiit Københavniliartunut atuutissaaq. Tassanimi angalasut unammillissutaapput – tamannalu suliniuteqarfiussaaq.
-Atuisunut tamanut atuuttussanik akinik appaarusunnaraluarpoq, massakkorpiarli nukiit unammillerneqarfitsinni matumani atortqariaqarpavut, Michael Binzer nassuiaavoq.
Akinik appaanik una Air Greenlandip ukiuni kingullerni marlussunni sipaarniuteqarluni suliniuteqareernerani pisinnaanngorpoq. Ilaatigut timmisartuutit DASH-8-nik taarsersulernerisigut, sulisunut isumaqatigiissutit annertunerusumik periarfissiinerisigut, ingerlatsiviup timmisartuni kiffartuussinerata naliliiffigeqqinneratigut, tassa tamakkiisumik isigalugu pisariakillisaalluni pitsanngorsaateqarnikkut.
Sineriak puigorneqanngilaq
Naak akinik appaanerit massakkorpiaq Nuummiit Københavnimut taamaallaat atuutissasoq, Air Greenlandip sinerissap sinnera puigunngikka Michael Binzerip erseqqissarpaa.
- Illoqarfiit akornanni bilitsinik akikitsunik amerlasuunik upernaaq manna immikkut tuniniaavugut, inuit assersuutigalugu apersortittuliarnissamut akissaqartitsinissamut periarfissinniarlugit, Air Greenland allappoq.
