Nuummiit angalasoqaqqissinnaanngortoq

Coronavirusimik tunillaassuuttoqarnera peqqutaalluni Nuummiit aallaqqusinnginneq sapaatit akunnerata siuliani atuutilerpoq. 

Aallaqqusinnginneq ullumi marlunngornermi atorunnaarsinneqarpoq. Tassa Nuummiit sinerissamut silaannakkut immakkullu angalasoqaqqissinnaanngortoq, tunillaassortunik nappaalanersuaqarneranut ataatsimiititaliarsuarmi siulittasoq Bjørn Bay ilisimatitsivoq.

Sinersorsaat Sarfaq Ittuk aamma angallassisinnaaqqilerpoq.

Nuummiit aallaqqusinnginneq ilimagisatut ullumi marlunngornermi atorunnaarsinneqarpoq. Aallaqqusinnginneq juunip ulluisa 16-ianniit ullumi juunip ulluisa 22-ata tungaanut atuuppoq.

AAMMA ATUARUK Nunatsinni coronavirusimik tunillatsissimasoq alla paasineqartoq: Nuuk matuvoq

Nuummi inuit tallimat coronavirusimik tunillanneqarsimasut sapaatit akunnerata siuliani paasineqarpoq, taamaammallu Nuummiit silaannakkut immakkullu angallattoqaqqusaajunnaarluni. 

Kangerlussuakkoorluni Danmarkimut taamaallaat timmisartuussisoqarsinnaasimavoq.

Munch Gruppenimili sulisut Nuummi mittarfiup tallilerneqaleruttortup eqqaani najugaqarfianni immikkut mattusimatitsineq suli atuuppoq. Tassani immikkut mattusimatitsineq Munch Gruppenimi sulisut akornanni tuniluuttoqartoq piinsip kinguninnguagut paasineqareersorlu atuutilerpoq. 

Sulisut taakku akornanni taakkulu attavigisimasaat akornanni allanik coronavirusimik tunillanneqarsimasoqartoq kingorna paasineqarpoq, taamaammat Nuummiit angallanneq ullumi marlunngornermi qasukkarneqareeraluartoq mittarfiup eqqaani immikkut mattusimatitsineq atuutiinnassaaq. 

Nuummi coronavirusimik tunillanneqarsimasut ataatsimik amerlisut arfininngornermi paasineqarpoq. Tassa imaappoq, coronavirusimik tunillanneqarsimasutut nunatsinni maannamut paasineqarsimasut katillutik 50-iupput.

Tunillanneqarsimasut maannamut quliupput, taakkunannga qulingiluat Nuummiillutik ataaserlu Ilulissaniilluni.