Nuummi zombierpassuit
Taamatut periusaq zombiewalksimik taaneqartartut USA-mi aallarnerneqarsimavoq siullerpaamillu tassa nunatsinni takutinneqartussanngorpoq. Tamatuminnga isumassarsisuupput GU-mi ilinniartitsisut fagit assigiinngitsut suleqatigiinneratigut taamatut pilersitsisut. Piffissaq tulluartuuvoq amerikamiut mitaartarfiat halloween pisussanngormat taannalu ileqqoq nunanut allanut siaruaakkiartorpoq.
- USA-mi internet aqqutigalugu zombiewalkimut aggersaasoqartarpoq, Nuummili allaanerulaartumik periuseqarpugut. Piffissaq sivisooq atorlugu piareersarpugut ilinniartitsinermilu aamma sammisimallugu. Fagit atuartitsissutit kemi, tuluttoorneq, assilialiorneq tusagassiutilerinerlu atorlugit sammisaqarpugut. Taamaasilluni zombiewalk pilerpoq neriuppugullu illoqarfimmi malugineqarluarumaartoq, zombiewalkimik aaqqissuisoq Chris Paton Nuummi GU-mi ilinniartitsisoq oqarpoq.
GU-mi ilinniartut ukiunut aallartittunut agguataarneri pingasut tamarmik peqataatitaqarniarput. Taamatut sammisaqaqatigiinnermi anguniarneqartoq pingaarneq tassaavoq ilinniartut ataqatigiinnerulernissaat imminnullu ilisarisimanerulernissaat. Ilinniartummi peqataasussat 70-it missaanniipput. Taakku saniatigut ilinniartitsisut pingasut peqataaniarput.
- Sammisaqarnitsinni angusaqarluarpugut ilinniartullu imminnut ilisarisimanerulersimapput. Peqataasut aamma zombiet pillugit ilisimasaqarnerulerput. Filmit zombienut tunngasut isiginnaarsimavagut nalilersorlugillu. Taakku saniatigut zombiet pillugit atuakkat soorlu Edgar Allan Poep atuakkiai atuarneqarput. Taakku saniatigut paasiniarsimavarput zombiet suminngaanneernersut sumillu pilersimanersut, ilimanarporlu inussiaateqarnerup nalaani pilersimasut, Chris Paton KNR.gl-mut oqarpoq.
