Nuummi illorsuaq timersortarfik siunertanut assigiinngitsunut atorneqartartoq isatersinnarlugu timersortarfissuarmik nutaamik taarserneqassaaq

Nuummi timersortarfissuarmik sanasoqartussanngorpoq

Nunatsinni timersortarfiit pisoqaanersaat Nuummi illorsuaq timersortarfik isaterneqassaaq timersortarfissuarmillu suliniaqatigiiffinnut allaffittalimmik taarserneqassalluni.

Nuummi timersortartut siusinnaartumik Kommuneqarfik Sermersuumiit tunissutisipput. Tunissutisiartilli puiarsinnaassanngikkallarpaat.

Timersortartunut juullimut tunissut tassaavoq timersortarfissuaq 2024-mi atulersussatut naatsorsuutigineqartoq taannalu Nuummi illorsuup timersortarfiup 1969-mi atulersup toqqavianiissaaq.

- Naatsorsuutigaarput nivariarneq siulleq 2021-mi pisinnaassasoq. Nuummi illorsuaq timersortarfik isaterneqassaaq timersortarfissuarmillu arlalinnik timersortarfittaqartumik taarserneqassalluni, Kommuneqarfik Sermersuumi borgmesteri Charlotte Ludvigsen KNR-mut oqarpoq.

Sanaartortitsisussaq tassaavoq Kommuneqarfik Sermersuup illoqarfiup ineriartorneranut suliffeqarfiutaa Nuuk City Development, suliarinnittussarsiuussinissarlu taakku piareersarlugu maanna aallartisarpaat.

- Sanaartugassat akia qanoq annertutigissanersoq maanna oqaatigisinnaanngilarput, Charlotte Ludvigsen (IA) oqarpoq.

Aaqqiissutaagallartussamik misissuipput

Nuummi illorsuarmi timersortarfimmi siulersuisut piareersaammik suliaqartuupput. Timersortarfissarsuaq 7.000 kvadratmeterisut annertutigissaaq aammalu timersorfiusinnaasut arlallit saniatigut nammineq piumassutsimik suliniartut kattuffiillu attartorsinnaasaannik allaffittaqassalluni.

Nuuk ullumikkut 18.000-it sinnerlugit innuttaqarpoq sulilu innuttaasut ukiut tulliuttut amerliartornissaat ilimagineqarpoq.

- Nuummi timersortarfiit maanna tattoqisaaffioreerput. Timersortarfissualiornikkut illoqarfitta inuttusiartornera piareersimaffiginiarparput aamma Nunatta nunarsuarmi timimik 2030-mi aalatitsinerpaaffinngornissaa suleqataaffiginiarlugu. Timersortarfissuarmi timersuutit arlallit ataatsikkut ingerlanneqarsinnaalissapput, Charlotte Ludvigsen oqarpoq.

Nuummi illorsuaq timersortarfik isaterneqarpat ukiup aappaata affaa timersortarfik taanna atorneqarsinnaassanngilaq.

- Sanaartornerup nalaani Nuummi illorsuup timersortarfiup taartigigallarsinnaasaannik periarfissanik misissuisoqassaaq, Charlotte Ludvigsen naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat