Nuummi tillinniartoqartarnera suli ajornartorsiutaasoq
Sapaatit-akunnerata siuliata ingerlanerani tillinniarnerit pillugit suliat 20-t politiinit aallartinneqarput, taakkunannga qulingiluat pisiniarfinni tillinniarnermut tunngassuteqarlutik.
Politiit innuttaasut kaammattoqqippaat angerlarsimaffiup qimannginnerani igalaat matullu matoqqanissaat parnaaqqanissaallu eqqaamasaqqullugu. Aammattaaq pasinarsinnaasunik siumugaqaraanni Nuummi politiit oqarasuaatikkut 701448-mut attaveqarfigineqartarnissaat kaammattuutigineqarpoq.
AAMMA ATUARUK Nuuk: Tillinniat Applemeersunik tillinniartartut
Politiinik sioorasaarisoq
Illumut ujaqqanik milloortoq, atiatigut taallugu, Nuummi politiinut marlunngornermi aggustip sisamaani unnukkut kalleriunneqarpoq.
Politiit ornigupput inullu ataaseq tigusarineqarluni. Tigusarinninnermut atatillugu politiit tigusaasumit sioorasaarneqarput.
Tigusarineqartoq inatsit tunngaviusoq naapertorlugu ullumi killisiorneqassaaq eqqartuussivimmullu suliassanngortinneqassalluni.
Nuummi politiit ujajaasoqarsimaneranik sapaammi aggustip qulingiluaani unnukkut qulingiluanut qiteqquttoq kalerrinneqarput. Sikaratsinik ujajaaffigitittoqarsimavoq tassungalu atatillugu pinerlineqartoq niaqumminneqarsimalluni. Pasineqartoq unnukkut kingusinnerusukkut politiinit tigusarineqarpoq eqqartuussivimmullu suliassanngortinneqassaaq.
Nuummi politiit aqqusinikkut angallannermut immikkoortuat aamma sapaatit-akunnerata siuliani immikkut suliniuteqarput. Tassungalu atatillugu suliat 14-it aallartinneqarput, taakkunannga arfineq-pingasut biilertilluni oqarasuaammik angallattakkamik atuisimanermut tunngasuullutik.
