Nuuk: Tillinniat Applemeersunik tillinniartartut
- Politiit pisiniarfinni tillinniarnerit arlallit immikkut misissuiffigaat, ilaatigut imigassanik, kavaajanik qarasaasianillu angallattakkanik Applemeersunik tillittoqartarsimalluni.
- Aammattaaq inuit tillinniarfigitissimapput, ilaatigut assiliissummik tillittoqarsimalluni. Aamma illunut iserterluni tillinniartoqarsimavoq, taakkunanilu aamma qarasaasianik angallattakkanik Applemeersunik tillittoqarsimalluni, Nuummi Politiit taama ilisimatitsipput.
Angerlarsimaffiup tillinniarfigineqannginnissaa qulakkeerniarlugu iliuuseqaqqusisut
Politiit innuttaasut kajumissaarpaat angerlarsimaffik qimaleraangamikku igalaat matullu ammatiinnartaqqunagit, aammalu pasinartunik naammattuugaqassagaluarunik politiinut sianeqqusillutik.
Aammattaaq pisiniarfinnut allanulluunniit tillinniartunik takusaqartoqassagaluarpat pisiniarfimmi sulisunut politiinulluunniit innuttaasut saaffiginneqqullugit kajumissaarneqarput.
Tillitanik pisinaveersaarit
Politiit aamma erseqqissaatigaat atornikunik tuniniakkat, soorlu assersuutigalugit Applemeeersut iPhonet, iPadit qarasaasiallu allat tillitaasinnaammata.