Nuummi qinersivik: Suli akunneq ataaseq ammaannarallassaagut
Nuna tamakkerlugu qinersiviit sumiiffinni assigiinngitsuniittut matoreerput, taasinerillu kisinneqaleruttorput.
Nuummili qinersiviit ammannaarallarnissaanut periarfissaq annertuvoq. Nuummimi inuit inussiviup eqqaani siuleriiaartorpassuupput, taamaattumillu qinersivik akunnerit arlallit qaangiuppata aatsaat matussasoq ilimanarpoq.
Kommuneqarfik Sermersuumi attaveqaqatigiinermut pisortaq, Lars Damkjær taama ilisimatitsivoq.
- Qinersivik sivikinnerpaamik akunneq ataaseq suli ammatinneqassasoq naatsorsuutigaarput, taanna taama oqarpoq.
Nuummi qinersineq inussivimmi pivoq, nuummilu qinersivissani kisiartaavoq. Kommunimut Inatsisartunullu qinersinermi inuit 13.000-t 14.000-illu akornanniittut qinersiartornissaminnut ullumikkut periarfissaqarput.
Illoqarfimmilu inatsisartunut qinersisut 33 procentii qinersiartorsimasut ullumi nalunaaqutaq tallimanut kisinneqarsimapput. Kommunimullu 21 procentii qinersisimallutik.
Qinersisartullu ilaat Josephine Singertât-Jørgensen kingusinaarluni takkuppoq. Taassumami inussivik unnummut arfineq pingasup qeqqa saneqqussimavaa, siuleriiaartorpassuaqarmallu qinersinngitsoorluni uteqqiinnarsimavoq.
Arfineq pingasunulli siuleriiaartut qinersinissaminnut periarfissaqartut tusarsimavaa, taamaalillunilu qinersivimukaqqissimavoq, taanna taama KNR-imi sulisut ilaannut oqarpoq.
