Nuummi Qaqortumilu internetikkut Flatrate
Ukiorpassuarni innuttaasut internetikkut flatrate-mik pisisinnaalernissartik annertuumik kissaatigisimavaat. Kissaat tamanna maannakkut Nuummi Qaqortumilu piviusunngulerpoq.
-Maannakkut flatrate Nuummi Qaqortumilu tuniniarneqarsinnaalermata Naalakkersuisut naammagisimaartorujussuuaat. Maannakkorpiaq ajoraluartumik flatrate nuna sinnerani atulersinnaanngilaq. Kisiannili tunisassiat tassunga assingusut Kalaallit Nunaata sinneranut siaruartinneqarsinnaanersut TELE Greenland A/S-ip kingusinnerusukkut naliliiffigissavaa. Tunisassianik tassunga assingusunik nunap sinneranut neqerooruteqarsinnaaneq ajornarunnaarpat, tamatuma pinissaa soorunami Naalakkersuisunit kissaatigineqarpoq, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.
Flatrate-p taamaallaat Nuummi Qaqortumilu tuniniarneqarsinnaaneranut pissutaavoq, illoqarfiit marluk taakku kisimik immap naqqatigut kabelimut toqqaannartumik atassuserneqarsimammata.
Matumani atuisunut inuinnarnut atueriaatsit assigiinngitsut marluk, aammalu atuisunut inuussutissarsiutinik ingerlataqartunut atueriaatsit pingasut pineqarput. Matuma kinguliani tunisassiat nutaat pillugit allaaserisat takusinnaavatit:
Takussutissiaq 1 Qaqortumi Nuummilu bredbånd flatrate-mut tunisassiat nutaat
|
Tunisassiaq |
Sukkassuseq (Mbit/s) |
Atuineq (Qaammammut koruuninngorlugit) |
|
Bredbånd Flatrate 2 Mbit |
2/0,5 |
1.099 |
|
Bredbånd Flatrate 4 Mbit |
4/0,5 |
1.499 |
Takussutissiaq 2 Qaqortumi Nuummilu inuussutissarsiutinik ingerlataqartunut flatrate-mut tunisassiat nutaat
|
Tunisassiaq |
Sukkassuseq (Mbit/s) |
Atuineq (Qaammammut koruuninngorlugit) |
|
Flatrate Pro 2 Mbit |
2 |
6.000 |
|
Flatrate Pro 4 Mbit |
4 |
8.000 |
|
Flatrate Pro 8 Mbit |
8 |
12.000 |
Nunani allani takuneqartareersutut ”naapertuuttumik atuineq”-mik taaneqartoq atuutsinneqassaaq. Tassalu atuisuni annertoorsuarmik atuisuusuni sukkassuseq arriillisinneqarsinnaassaaq, taamaalilluni atuisut allat sukkassutsimik naammaginartumik atuisinnaassallutik.
Internetimut tunisassiat nutaat 1. marts 2013 aallarnerfigalugu pisiarineqarsinnaalissapput.
TELE Greenland A/S-imit ilisimatitsissutigineqarpoq, TELE Greenlandimi internetimik atuisut qaammatit sisamat siulliit ingerlanerini atuinerminnik akeqanngitsumik nuussisinnaasut.
