Nuummi Qapiarfiusaami toqutsinermut suliaq naammassineqarpoq
Angutit pingasut 17-nit 20-nut ukioqartut angummik 26-nik ukiulimmut toqutsinermut atatillugu pasineqarlutik Sermersuup eqqartuussiviani juunip qaammataani suliarineqarput.
Angut 26-nik ukiulik Qapiarfiusaami siorna toqutaavoq. Angut 20-nik ukiulik toqusitsimasutut unnerluunneqarpoq, allat marluk toqutsineq sioqqullugu persuttaasimasutut unnerluussaallutik.
Angut 20-nik ukiulik toqutsisutut Sermersuup Eqqartuussiviani eqqartuussaavoq eqqartuussinermi tassani aalajangiunneqarpoq, angut 20-nik ukiulik Danmark-imi parnaarussivimmi Herstedvesteri-imi tarnimikkut napparsimasut katsorsartarfiannut killigaanngitsumik inissinneqassasoq
Taamatut aalajangerneq Kalaallit Nunaata eqqartuussisuuneqarfiani ullumi aalajangiifigineqarpoq.
Kalaallit Nunaata eqqartuussisuuneqarfianit unnerluussisussaatitaasup Lars Kirkegaardip aalajangerneq iluarisimaarpaa.
Sermersuup eqqartuussiviani aalajangerneq Kalaallit Nunaata eqqartuussisuuneqarfiani aalajangiunneqarpoq, taannalu ataatsimut isigalugu tupaallannartortaqartinngilarput aallartinneqarmalli taamatut inerneqarnissaa naatsorsuutigisimagatsigu, Lars Kirkegaard oqarpoq.
Toqutsineq sioqqullugu persuttaanermi pisut marluk, pinngitsuutinneqarnissamik 20nik ukiullip toqutsip Kalaallit Nunaata eqqartuussisuuneqarfianut ingerlateqqippai aamma pineqatissiissutigineqartup imarisaa aamma sivisussusia pillugu.
Angutip 20-nik ukiullip danmark-imi tarnimikkut napparsimasut katsorsarfiannut inissinneqarnissaa Kalaallit Nunaata eqqartuussisuuneqarfiata pingaartippaa Lars Kirkegaard oqarpoq. Taassuma suliamut atatillugu politiit annertuumik suliaqarsimanerat naammagisimaartorujussuuvaa.
Politiit paasiniaanerat annertooruussuuvoq aallaqqaammuli suliaq ilungersunarsimavoq pisumullu paasisat annertunerulermata paasiniagassat amerlasoorujussuusut paasinarsivoq, teknik-imut tunngasortai aamma suliap ingerlanneqarnerata nalaani nalilersuinerit pisimalutik Lars Kirkegaard oqarpoq.
Angutip 20-nik ukiullip toqutsineranut atatillugu suliaq maanna naammassineqarpoq, Angut 20-nik ukiulik piffissami qaninermi Danmark-imi parnaarussivimmut Herstedvesterimiittumut nuunneqassaaq pineqatissiissutigineqartoq nangissallugu.
Angutip 20-nik ukiullip illersuisuiata piumasarigaluarpaa toqutsisoq nunatsinni pineqaatissinneqarsimasunut inissiisarfimmut inissinneqassasoq ukiuni arfineq pingasunik qulinilluunniit sivisutigisummik tassani tunngavilersuutigineqarluni angutip toqutsisup toqutsinermi pinerluutaa sakkortooq siulliummat.
Kalaallit Nunaata eqqartuussisuuneqarfiani eqqartuussisup suliap aalajangiiffigineqarnissaa pitinnagu angut 20-nik ukiulik naggammik oqaasissaqarnersoq aperineqarami taassa piliarisimasani ugguaralugu oqarpoq.
Sermersuup eqqartuussiviani juunip qaammataani eqqartuussisoqarmat aalajangiunneqarpoq, toqutaasup qaniginerpaasai pingasut, tassalu anaanasoq ataataasoq aamma qatanngutaa tamarmik immikkut 100.000 kr-nik taarsiiffigineqassasut.
Kalaallit Nunaata eqqartuussisuuneqarfiata tamanna allanngortippaa, tassalu toqusup qatanngutaa kisimi taarsiiffigineqartussanngorlugu. Qatanngutaasup taassuma angut 26-nik ukiulik toqutaasoq, toqutaanissaata tungaanut najortigiissimmammata, qatanngutaasup ukioq ataaseq efterskolernera eqqaassanngikkaanni
