Nuummi qallunaajusutut Danmarkimilu kalaaliusutut isigineqartarpunga
Saqqummersitsineq ”Oqaaseqanngitsut” Norgep avannaanut Nuummullu angallanneqareerluni Kalaallit Illutaanni Københavnimiittumi maanna tassa takuniarneqarsinnaalerpoq.
Saqqummersitsinikkut ersersinniarneqarpoq kalaaliugaluarluni qallunaatuinnaq oqaaseqartuusarneq aammalu Sameulluni Samesut oqalussinnaanani Norgemiusulli oqaaseqartuusarneq.
Tamanna ikinnerussuteqartut iluanni ikinnerussuteqartuunertut saqqummersitsisunit nassuiarneqarpoq.
-Qujanartumilli amerlanerpaat nunagisami oqaatsinik pingaarnernik oqaaseqartuupput, taamaattorli ilaqarlutik pissutsit assigiinngitsut peqqutigalugit nunagisami oqaatsit pingaarit atorlugit oqalussinnaanngitsunik, taamaalillutillu avataaniittutut misigisartunik. Tassa ikinnerussuteqartut iluanni ikinnerussuteqartutut misigisartunik, 37-nik ukiulik Jukke Rosing oqarpoq.
Jukkep assilisanik katillugit 29-nik Danmarkimi maanna saqqummersitseqatigaa 35-nik ukiulik Marte Lill Sambye.
-Kikkuunerput suminngaanneernerpullu takutikkusupparput. Amerlanerit isumaqartarput kinaassuseq oqaatsillu imminnut pinngitsoorneqarsinnaanngitsumik qileruteqartut. Oqaatsinik pingaarnernik atuisinnaannginneq sumut atasuunermik ilaanermillu migissuseqarnissamut akornutaasariaqanngilaq, Nuummeersoq Jukke Rosing, manna Danmarkimi Ærø-mi najugaqartoq oqarpoq.
Kulturerisap avataaniittarneq
Saqqummersitsinermi ersersinniarneqarpoq nammineq kulturerisap avataaniittutut misigisimasarneq tamatumalu nassatarisaanik kinaassutsikkut ajornartorsiuteqalersarneq. Eqqartorumaneqartanngitsumik kiisalu nunagisami oqaatsit pingaarnerit atorlugit oqaaseqartuunnginnerup kanngunartutut isigineqartarneranik qangiinissaq siunertaralugu misileraaneruvoq.
Saqqummersitsineq oqallinnissamut kinaassutsimillu aalajangiussinissamut pisinnaatitaaffeqarnermut ammaassisinnaasoq, Jukke Rosing nassuiaavoq.
Saqqummersitat ilaat "Oqaaseqanngitsut" Jukke Rosingimit aamma Marte Lill Sombyemit
-Nuummi qallunaajusutut isigineqartarpunga Danmarkimilu kalaaliusutut isigineqartarlunga, tamannaluuvoq iliuuseqarfigerusutara, Martelu aamma taamatut misigisimassasoq ilimagaara. Soorluli kinaassuseq aalajangersimasoq pigisariaqartoq. Kinaassutsimik aalajangiisinnaataaffeqarusunnermik siunertaqarpoq. Nangipporlu:
-Marte Norgep kujataamiuusoq nunaqqatiminit Sameusutut igisineqartarpoq Samesullu oqaaseqartuunissaa aamma naatsorsuutigineqartarluni, Norgellu avannaaniikkaagami Samesut oqalussinnaannginnera eqqumiigineqartarpoq.
-Uanga Nuummi aamma taamatut misigisarpunga. Kalaallisut oqaaseqartuunnginera eqqumiigisarpaat ilaatigullu uumigisarlugu. Danmarkimi aperineqartarpunga sooq kalaallisut oqalussinnaannginnersunga. Taamaalillunga inooqataanera illersortuartariaqartarpara.
Igalaaq tarrarsoqatigiiffiusinnaasoq
Assilisat Norgep avannaani, Nuummi Københavnimilu saqqummersinnissaat pingaaruteqarsimavoq:
-Sumiiffiit pingasut taakkua toqqarsimavagut tamanna ataatsimoorluta oqaluttuarisaanitsinni pingaaruteqartorjussuummat. Sumiiffinnut taakkununnga anngunnissaat pingaaruteqarpoq ajornartorsiutigisatsinnut ilaalluinnarmat. Neriuutigaarput inuit uagutsinnik immaqa equngalaartumik isiginnittartut eqqarsarluaqqaartarnissamut isumataartinneqassasut kiisalu inuit uagutsitut misigisimasartut kisimiinnginnertik paasillugu oqaliallaatigiumaaraat.
Saqqummersitsineq ”Oqaaseqanngitsut” Danmarkimi Kalaallit Iluutaanni apriilip aallaqqaataata tungaanut takuniarneqarsinnaassaaq.
