Nuummi politiit ullumi ulappupput

Tigusarineqartuni marluk inatsit tunngaviusoq naapertorlugu aqagu killisiorneqassapput.

Angut ataaseq sakkulersorluni ujajaaniarsimasutut unnerluutigineqassaaq, ataaserlu inuit inuunerannik navianartorsiortitsisimasutut unnerluutigineqassalluni. Pingajuat malittarisassanik unioqqutitsisimasutut isertitsisarfimmiitinneqartussanngussagunarpoq. Taanna imigassartorsimatilluni illoqarfiup qiterpasissuani aallaasilisarsimavoq. Nuummi politiit taama nalunaaruteqarput.

Nuummi politiit nalunaaqutaq ualikkut pingasut missaanni siullermik kalerrinneqarput, pisiniarfik Kamik Nukøb ujajaaniarfigitissimammat. Angut inuusuttoq 19-inik ukiulik aningaasat tigoriarlugit qimaariaraluarpoq, kinguninnguali tigusarineqarluni.

Angut politiinut oqaaseqarusussimanngilaq, politiilli qularinngilaat tassaasoq sakkulersorluni ujajaaniaq.

Ujajaaniarnermi inunnik ajoqusertoqanngilaq, pisiniarfimmili sulisut soorunami aalassassimaaqaat.

Nalunaaqutaq tallimanut qiteqquttoq angut aalakoortoq illoqarfiup qeqqani tigusarineqarpoq. Angut taanna aallaasilisarsimavoq, politeeqarfiliaanneqarlunilu. Killisiorneqareeruni iperagaassangatinneqarpoq. Angutip nassuiaanermini ilaatigut oqaatigaa aallaanni tuniniarsimagalugu.

Aallaat arsaarinnissutigineqarpoq, angullu akiliisussanngortinneqarsinnaalluni.

Kinguninngua nalunaaqutaq tallimanut tanneq qulit missaanni politiit aamma kalerrinneqarput.

Angut 42-nik ukiulik Nuummi blokkit ilaanni Blok 1-imiit aallaasersulersimavoq marloriarluni pingasoriarluniluunniit eqqarsimalluni. Politiit angut unitsippaat tigusaralugulu.

Sooq eqqarsimanersoq ilisimaneqanngilaq angulli inatsit tunngaviusoq naapertorlugu aqagu killisiorneqassaaq, tigummigallarneqarnissaalu piumasarineqassalluni.

Angutip 42-nik ukiullip eqqarnerani inunnik ajoqusertoqanngilaq.

Vicepolitikommissærip Poul Petersenip innuttaasut ikiuisimanerannut qutsavigai.