Nuummi pisortatiguunngitsumik unammisitsineq
Arfininngornermi unamminerup Iceland Gamesimut anngunniuteqataasinnaasunik nunatsinni triatlonimi timersortartoqartoq uppernarsarpaa, unammeqataasut Kalaallit Nunaanni Timersoqatigiiffiit Kattuffiata Island Gamesimi triatloneqataanissamut piumasaqaataat angummassuk.
Unamminermi isorartussutsit tassaapput 1.500 meterisut isorartutigisumik nalunneq, 43, 1 kilometerisut isorartutigisumik sikkilerneq kiisalu 9,8 kilometerisut isorartutigisumik arpanneq. Isorartussutsit OL-imi isorartussutsinut naleqqiulluarneqarsinnaasut. OL-imi Island Gamesimilu triatlonertitsinermi isorartussutsit atuuttut tassaapput 1.500 meterisut isorartutigisumik nalunneq, 40 kilometerisut isorartutigisumik sikkilerneq kiisalu 10 kilometerisut isorartussusilimmik arpanneq.
Ullumi unamminermi peqataasut pingasuuput tassannga marluk naammassipput.
Ajugaasoq tassaavoq Christian Keldsen, taassuma triatlonimut atorpai akunnerit marluk minutsit 18-nit sekundillu 46-t. Tulliulluni apuuppoq Jens Bjerge, taassumap akunnerit marluk minutsit 25-t sekundillu arfineq-marluk triatlonimut atorpai.
Peqataasut pingajuat, Johan Frederik Lennert sikkilerluni uniinnartariaqarsimavoq.
Christian Keldsen, illit Jens Bjergelu Iceland Gamesimut ukiup tulliani peqataanissassinnut periarfissaqalerpisi?
- Kalaallit Nunaanni Timersoqatigiiffiit Kattuffiat triatlonimi timersortartunik ilaatitsissagunarpoq, sulili taakku kikkuussanersut aalajangerneqanngilaq triatlonertartut nunatta avataanni najugallit peqataanissaanut periarfissiisoqartussaassammat. Ullumi unamminitsinni piffissaq atugara piumasarititaasup iluaniippasippoq Jensillu piffissaq atugaa killissarititaasup nalerpiaaniilluni. Kalaallit Nunaanni Timersoqatigiiffiit Kattuffiat aalajangeqqaartussaassavaat timersortartut qassit peqataatinniarnerlugit. Nutaarsiassalli nuannernersarigunarpaat timersortartut nunatsinneersut peqataanissaat, taamaallaat suli paasinngilarput taakku kikkuussanersut, Christian Keldsen KNR-imut oqarpoq.
Triatlonertartut Malik Lynge Reiding, Stig Brahe Sørensen Mikael Tinghuusilu peqataasinnaasimanngillat, nunattali avataani Island Gamesimut anngunniutsitsinissaq piviusunngortinniarneqarpoq.
Island Games Bermudami aappaagu juulip 13-ianiit 19-iata tungaanut ingerlanneqassaaq.
