Nuummi pisiniarfiutilik corona pillugu killilersuinernik unioqqutitsisimasutut akiliisitaasoq
Inuit amerlavallaat pisiniarfimmut ataatsikkut isersinnaatissimagai politiit isumaqarput, inuimmi ima amerlatigisimapput imminnut qanillinaveersaarnissamik peqqussut malissinnaasimanngikkaat, politiit isumaqarput.
Sulisut nerisassanik passussinermi aaqqateqartarnissaannut peqqussut sulisitsisup qulakkeersimanngikkaa nalilerneqarpoq, naak coronap tuniluutinnginnissaa pillugu taama peqqussuteqartoqaraluartoq.
- Suliffeqarfiutillit killilersuinerit pillugit oqaloqatigilluartarpagut, tamannalu angusaqarluartarfigalugu, politimesteri Bjørn Tegner Bay tusagassiutinut nalunaarummi ilaatigut oqarpoq, nangillunilu:
- Suliffeqarfiutilik pineqartoq arlaleriarluta orniguffigisimavarput, peqqussutillu malittarsimanngikkai arlaleriarluta paasivarput, akiliisitaanissaalu maanna aalajangerlutigu, politimesteri oqarpoq.
Pisiniarfiutilik pineqartoq killilersuinernik pingasoriarluni unioqqutitsisimasutut 9000 koruuninik siornatigut akiliisitaasimavoq.
Akiliisitaanerli kingulleq pisiniarfiutillip akilerumanngilai, suliarlu eqqartuussivitsigut aalajangiiffigisassanngortinneqartoq politiit ilisimatitsissutigaat.
