Nuummi nunaqarfiinilu nipilersortunik aalaaluttuinnaanialeqaaq

Sapaatip akunnerup uuma naanerani Nuummi nunaqarfiinilu sumi tamaani nuannattoqarlunilu nipilersortoqassaaq. Tallimanngorpammi inuiattut ullorsiornerput naliginnaasumik ingerlanneqarnerata saniatigut nipilersortartorpassuit illoqarfimmi kangerlummilu nunaqarfinni ataatsimuualaarnialeqaat.
Allattoq Peter Troelsen, Knud Reimer
juunip 19-at 2013 11:38

Nipilersortartut nunatsinnit tamaneersut saniatigut Filippinerermiut, Schweitz-imiut Savalimmiormiullu nipilersortartui tusarnaartitsisaqattaarniarput. Aamma nipilersortartut Norgemeersut Sverigemeersullu peqataassapputtaaq. Tusarnaartitsinissat tamarmik akeqassanngillat, asulu nipilersoriaatsit uagutsinnut qaqutigooqisut tusarnaariarnissaat periarfissarissallutigu.

Tallimanngorpat, tassa inuiattut ullorsiornitsinni nipilersortartut 60-t 70-llu akornanniittut innuttaasunut takornarissanullu Nuup illoqarfiani nuannisartitsissapput.

Arfininngorpat nipilersortartut 40-t missaaniittut Qoornumut Kapisilinnullu tikeraassapput, taakkunanilu qaqutigooqisumik nipilersortartunik pikkorilluinnartunit tusarnaartinneqassallutik.

Sapaatiuppat aasaanerani tusarnaartitsinissaq Katuami ingerlanneqassaaq. Tassani tusarnaartitsisoqalerpat KNR-ip niviaaluit erinarsortartoqatigiivi Sofi Ek-imik siulersorneqarlutik ingiallorneqassapput, Mike Fencher Thomsen pikkorilluinnarluni nipilersortartunik ilisarititsisassaaq, tusarnaartitsisaqattaarnissallu tamarmik Arnannguaq Gerstrøm-imik aqqiissuunneqarput siulersorneqassallutillu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq