Nuummi Niuernermik Ilinniarfimmi ukioq atuarfiusoq nutaaq aallartilerpoq
TNI-mi atualertussat 66-iupput, TMI-mi tunngavisumik atualertussat 15-iupput TNI-18-imilu atualertussat 19-iullussallutik. Aamma NI-1-imi atualertussat 47-iupput akademimilu atualertussat 27-iussallutik. Taakku saniatigut niunermik ilinniarfik amerlaqataanik, maanna suliffimmik misiliisunik atuartuuteqarpoq.
Niuernermik Ilinniarfimmi atualertut tamarmik ileqquusumik Rusrallytoqarneranut tallimanngorpat peqataassapput. Atuartut atuaqatigiit ilinniakkallu apeqqutaatinnagit akuleriissinneqassapput assigiinngitsorpassuarnillu sammisaqartinneqarlutik. Atuartut ilaatigut inunnik pyramideliussapput, bold-golferlutik, speed datingerlutik sattallutillu.
Atuartut taamaasillutik imminnut ilinniarsinnaapput, ukiullu siuliini misilittagarineqarpoq, atuartut, pingaartumik sinerissameersut illoqarfiit pingaarnersaanni ilisarisimasaqarpallaanngitsut rusrally iluaqutigilluartaraat. Aamma atuartut taamatut sammisaqaqatigiinnermikkut imminnut ilisarisimanerulersarput atuarnerullu sinnerani ikinngutitaartornissaq ajornannginnerulersarluni.
