Nuummi naluttartut OL-rtussanut unammissasut
Nuummi naluttartut tamassa sungiusaruttulerput Reykjavik International Gamesimi febuarip aallartilaarnerani pisussamut peqataassamaaramik.
Sungiusarnermi killiffik uuttorneqarpoq sapaatip akunnerata naanerani unammiuaarneq Nuuk open pimmat.
Reykjavik International Games tassaavoq Islandimi timersuutini assigiinngitsuni nunanit tamalaaneersut unammiuaartarnerat. Aaqqissuisut maanna nalunaarput Islandimiit aamma Danmarkimiit OL-mi peqataasussat arlallit peqataaniarlutik nalunaareersut.
Naluttartut Nuummeersut aamma periarfissaqarput qallunaat pissartanngorniunneranni peqataanissamut.
- Naluttartuutitta ilaat qallunaat pissartanngorniunnerannut anngunnissamut periarfissaqarput. Aamma anguniarparput naluttartoq ataaseq marlulluunniit qallunaat pissartanngorniunneranni finalemut anngutseriarnissaat, sungiusaasoq Jonas Tetzchner KNR-mut oqarpoq.
Kisimiittariaq - ataatsimoornartorli
Nuummi naluttartut klubbiat siusinnerusukkut Reykjavik International Gamesimi inuusuttuaqqani peqataatitsisarpoq. Maanna piukkunnaatillit pikkorilluinnartunut unammillertussanngorput.
Isumalluaammernerlu pivoq sapaatip akunnerata naanerani unammiuaarneq Nuuk open naammassimmat, tassani klubbimi rekordit nutaat aqqanillit anguneqarmata. Aamma siullerpaamik butterflymi 200 meterimut unammisoqarpoq.
Naluttartut arlallit sapaatip akunneranut nalunaaquttap akunnerpassuini sungiusartarput, naallu tamarmik immikkut ingerlaarfeqaraluarlutik ataatsimuussuseq misigisarpaat.
- Nalunneq ataasiakkaarluni timersuutaagaluartoq aamma timersuutaavoq ataatsimoornermik misigiffiusartoq. Taamaattumik pingaartorujussuuvoq naluttartoqatigiinnik eqimattaalluartunik peqarnissaq. Eqimattatullu ataqatigiilluartoqarpat sunarujussuaq anguneqarsinnaavoq, Jonas Tetzchner oqarpoq.