Nuummi nakuusernerit siornamut naleqqiullugit amerlanerusut
Sapaatit akunneranni kingullermi nakuusertoqarnerani, angutit aapparisartik aapparisimasartilluunniit nakuuserfigisimavaat. Angutit nakuusertut marluusut persuttaasimasutut unnerluutigineqassapput isertitsivummullu mattunneqarnissartik naatsorsuutigisinnaavaat. Sapaatit akunnerata naanerani angut utoqqasaaq angummik inuusuttumik toqutsiniarluni sioorasaarisoq aamma tigusarineqarpoq. Angut tigusarineqartoq politiinut tunniutiinnarumasimanngilaq, qasilitsunilli seqqartarneqarami aatsaat tunniutiinnarsimalluni. Tigusarineqartoq toqutsinissamik sioorasaarisimatut maanna unnerluutigineqarpoq. Politiit aqqaneq-marloriarlutik angerlarsimaffimmi eqqissiviilliortunut aggersarneqarsimapput, taakkunanngalugu ajoraluartumik pingasut meerartaqarsimapput.
Taakku saniatigut pinerluttuliornermut inatsimmik unioqqutitsinerit 46-t suliarisimavaat, angallannermut inatsimmik unioqqutitsinerit qulit, ikiaroornartut pillugit inatsimmik unioqqutitsinerit 18-it, ikuallattoornissamut inatsimmik unioqqutitsineq ataaseq politiillu maleruaqqusaannik unioqqutitsinerit marluk. Tigusarisamik unioqqutitseqqinnginnissaa, najuukkallarnissaa imaluunniit allanik attaveqaqateqannginnissaa pisariaqartutut nalilerlugu politiit 23-eriarlutik tigusarinnissimapput, Niels Nyvang Nuup Politiivineersoq paasissutissiivoq.
