Nuummi misissuinermut atortussat aningaasaateqarfimmit millioninik tapiiffigineqartut

Novo Nordisk Fonden nunatsinni coronavirusimut atatillugu suliniutaagasuartunut aningaasanik tunniussaqaqqippoq.

Aningaasat, Novo Nordisk Fondenip coronamut atatillugu suliniutinut atorneqartussanngortitaanit kingulliit Peqqinnissamut Naalakkersuisoqarfimmut tunniunneqarput.

Naalakkersuisoqarfik Aningaasaateqarfimmit 2,8 millionit koruuninik tunineqarpoq, taakkulu COVID-19-imut Nummi misissuissutaagallartussamit misissuinermik suliaqarnermut atorneqassallutik.

Novo Nordisk Fonden tunissuteqarnermini nalunaarummi taama allappoq.

AAMMA ATUARUK Novo Nordisk Fond corona pillugu nunatsinni suliniutinut 1,3 millioner koruuninik tunniussisoq

Misissuinermut atortorissaarutit pilersinneqannginneranni nunatsinnit misissugassatut tigusat Statens Serum Institutimut Danmarkimiittumut nassiunneqartaraluarput.

Tamanna piffissamik atuiffiungaatsiarpoq aningaasaqarnermullu unammillernartoqartitsilluni. Nunatsinnili maanna nammineerluni misissuisoqarsinnaalerpoq.

Nuummi misissuinermut atortorissaaruteqalernera nunatsinni tuniluuttoqangaatsialissagaluarpat Peqqinnissaqarfimmut sakkussagissaarnerulersitsivoq.

Nunatsinnimi tuniluuttoqalissagaluarpat napparsimasut mattusimatinneqartariaqartut paasineqanngitsut amerlasoorujussuanngunnginnissaannut sukkasuumik akissutersinissaq pisariaqalertussaassaaq.

Aningaasat COVID-19-imik tunillatsissimasunik nunap ilaani nunaqarfinnilu napparsimmavinni uninngasunik nakkutiginninnissamut atortorissaarutinut, peqqinnissaqarfimmilu sulisunik pikkorissaanermut atorneqassapput.

Aammattaaq peqqinnissaqarfimmi sulisut pikkorissartinneqarnissaannut aningaasaliivoq.

AAMMA ATUARUK Novo Nordisk Fonden coronavirusip akiorniarneranut 50 millionit koruuninik immikkoortitsisoq

Kalaallit Nunaanni UNICEF coronavirus pillugu meeqqanut qaammarsaanissamut aamma 360.000 koruuninik aningaasaliiffigineqarpoq.

Kiisalu tusagassiivik Sermitsiaq.AG nunatsinni COVID-19 pillugu paasissutissiinermut aviisiliornissamut 241.000 koruuninik aamma aningaasaliiffigineqarpoq.

Novo Nordisk Fonden taamaalilluni nunatsinni coronavirusimut atatillugu suliniutinut katillugit 4,2 millionit koruuninik aningaasaliivoq.