Nuummi meeraaqqerivik covid-19-imik pasinartoqarnera pissutigalugu matoqqasoq
Nuummi radiop qaqqaani meeraaqqerivik Ungaavaraq matoqqagallarpoq.
Angajoqqaat ilaata ippassaq meeraaqqerivimmiissimasup covid-19-imik tunillatsissimanerata ullumi paasineqarnera tamatumani pissutaavoq.
Kommuneqarfik Sermersuup nittartakkamini taama allappoq.
Nakorsaaneqarfiup meeraaqqeriviup matuneqarnissaa aalajangigaraa.
Radiop qaqqaani meeraaqqeriviup matuneqarallarnissaa ullumimit aqagumut kiisalu oqartussat tuniluuttoqarnerani tunillatsissimasinnaasunik ujartuinerisa ersarinnerulernissaanut atuukkallarpoq,
Angajoqqaat meeqqaminnik meeraaqqerivimmiittuuteqartut covid-19-imut misissortinnissamut atatillugu oqartussanit toqqaannartumik attavigineqassapput.
Nuummi ulluunerani paaqqinniffiit sinneri nalinginnaasumik ammapput.
AAMMA ATUARUK Nuummi Nukissiorfinni sulisoq tunillatsissimasoq paasineqartoq
Apersortittoqarnerani kaffillernermi tunillatsittoqartoq
Illoqarfiit pingaarnersaanni ulloq pisoqarfiungaatsiarpoq. Nuummi ullup kingulliup ingerlanerani tunillatsissimasut nutaat tallimat paasineqarnerat nakorsaanerup Henrik L. Hansenip tusagassiortunik katersortitsinermi ullaap tungaani paasissutissiissutigaa.
Tunillatsissimasunit nutaanit tallimanit pingasut arfininngormat apersortitsisoqarnerani kaffillernermi nereqatigiinnermilu tunillatsipput.
Taamaammat inuit aaqqissuussinernut peqataasut 200-t tikillugit amerlassuseqartut ullumi nalunaaqutaq 12.30-mit misissortikkiartornissamut neqeroorfigineqarput.
Taamaakkaluartorli pissutsit nakkutigineqarsinnaasut nakorsaaneq naliliivoq.
- Attaveqarfiit sumiinnersut ilisimavagut. Inuit 200-t missaannik amerlassuseqarsinnaanerat ilisimavarput. Kisianni ilisimavarput nalunagu tunillatsissimasut piffissami sivikitsuinnarmi tunillaasimasinnaasut. Taamaalilluta nakkutiginnissinnaanerput qularutiginngilarput, nakorsaaneq oqarpoq.
