Nuummi meeqqat aasaanerani periarfissinneqarput

Nuummi meeqqat aasaanerani timersoqatigiinnerat, sapaatip-akunnerata massuma ingerlanerani aallartissaaq.

Atuarfimmi Timersorneq taama nalunaaruteqarpoq, Kommuneqarfik Sermersooq suleqatigalugu, sapaatip-akunnerit marlungajannik sivisussuseqartussamik aaqqissuussaqarsimammata.

Asimut pisunnermut, tupersimaarnermullu peqataasoqarsinnaassaaq, angallammillu Kangerluarsunnguanut tallimanngorpat angalaarnermut peqataasoqarsinnaassalluni.

Illuaqqat kommunip pigisaata eqqaanni eqqiaanissamut peqataasoqarsinnaassaaq. Saniatigullu allanik aamma periarfissarpassuaqassaaq.

Nuummi meeqqat aasaanerani timersoqatigiinnerat siorna aallarnerneqarpoq, aaqqissuisullu nalunaarutigaat peqataaniarlutik nalunaartut amerlaqisut.

- Meerarpassuit piffissap taamaalinerani ilaatigut susassaaleqisarput. Kammalaataat immaqa feeriarrassimasinnaapput, angajoqqaallu immaqa sulileqqereersimallutik. Taamaammat TV-p saavani issiannalersarput, soorlu aamma qarasaasiap saavani issiaannalersartut. Meeqqat aasaanerani timersoqatigiittarnerat kammalaatitaartornissamik periarfissiivoq. Ernera timersoriarnissaminut qilanaartuaannarpoq, angerlaraangamilu qiimasaqaluni, angajoqqaajusoq oqarpoq.

Atuarfimmi Timersornermiit nalunaarutigineqarpoq suli inissaqarluartoq. Meeqqat peqataarusuttut Inussiviliaannassapput, ullumi ullaap tungaani qulinut qiteqquppat matut ammarneqassammata.
Peqataatitaqarniaraanni meeqqamut ataatsimut 100 koruuneqassaaq. Aningaasat taakku naatitanut, nagguteeqqanut imermullu ilaatigut atorneqassapput, meeqqalli taquartarnissaat aamma naatsorsuutigineqassaaq.