Nuummi marlunnik tunillatsittoqaqqippoq
- Ippassaq misissuinermi Nuummi inuit marluk tunillanneqarsimasut nanineqarput, taassuma aappaa siornatigut tunillanneqareersimasumut qanigisaavoq, aappaalu tunillatsimasunik qanigisaqarsimanngilaq, nakorsaq Paneeraq Noahsen taama oqarpoq.
Taanna erseqqissaavoq Nuummi Covid-19-mik tunillaassuuttoqartoq oqartussallu naluaat tunillaassuunneq suminngaanneerpiaq aallaaveqarsimassanersoq.
- Oqartariaqarpugut Nuummi assorsuaq tunillaassuuttoqarpoq, oqarpoq.
Tunillaassuunnerup aallaavii assigiinngitsuniit sisamaniit aallaaveqarput. Nakorsaq aperaarput, aallaavissiuillutik paasiniaanerat sumut killinnersoq.
AAMMA ATUARUK Nuummi tuniluunneq: Tunillaassuuttoqarneranik ersiuteqarpoq
- Tunillatsittut nutaat maanna paasiniarneqaleruttorput, sulili inernerinik oqaatigisaqarsinnaanngilagut, Paneeraq Noahsen oqarpoq.
Sisimiuni coronamik tunillaasoqarsimaneranut tunngatillugu nakorsaq ima nassuiaavoq:
- Sisimiuni coronartumut attaveqarsimasut tamarmik misissortinnikuupput, aammalu sinneruttut misissorneqarumaarlutik, massakorpiarli takusinnaasagut malillugit Sisimiuni annertunerusumik tunillaassuuttoqanngilaq, Paneeraq Noahsen oqarpoq.