ASSIT Nuummi Ladies Circle Sisimiuni meeqqat illussaannut katersuiniartut
Aningaasanik katersuiniarnermut nerinertaqartumut, inuit 150-it missaanniittut billittinik pisisimapput. Taakku ilaatigut aliikkusersorneqarput Søs Fengerimit taassuma ilagalugit Malik Hegelund Olsen aamma Frederik Elsner.
Aningaasanik katersuiniarnermi amerikansk lottorimik taaneqartartumik makitsisoqartarpoq, eqqugassat Nunatsinni suliffeqarfinnit inunnillu ataasiakkaanit tunissutigineqarsimasut eqqorneqarsinnaallutik. Tamatuma saniatigut akitsorterussineqarpoq peqataaffigineqarluartumik.
Sinneqartoorutit Sisimiuni meeqqar illussaannut tunniunneqassapput
Aningaasat katillugit 145.000 koruunit isertinneqarput. Taakkulu tamarmik Sisimiuni meeqqat illussaanik sanaartornermut atorneqassallutik. Taanna illu Nanu Børnimit ingerlanneqassaaq.
Nuummi aningaasanik katersuiniarnerup saniatigut Danmarkimi aamma taama pisoqarpoq. Nuummi Ladies Circle klubip naatsorsuutigaa aningaasat Danmarkimiit pissarsiarineqartussat 200.000 koruunit 300.000 koruunillu akornanni amerlassuseqassasut.
AAMMA ATUARUK Nuummi Ladies Circle meeqqanut ikiortarialinnut katersuiniassapput
- Aningaasanik taama amerlatigisunik katersuisoqarnissaa naatsorsuutigisimanngikkaluarparput. Nuummi Ladies Circle klubimi suleqataasut ikuiuulluaqisut qutsatissaapput annertuumik, Nuummi Ladies Circle klubip siulittaasua, Katrine Najaaraq Schmidt tusagassiutinut nalunaarummini allappoq.
Ladies Circle klub nunarsuatsinni suliniaqatigiiffiuvoq arnaannarnik 18-nit 45-illu akoranni ukiulinnit ilaasortaqartoq. Nuummi ilaasortaapput arnat 15-nit.
